《小傳日記》小米事前工夫做到足，但係架車幾時郁？

　　《小傳日記》魚缸勁升兩日之後，今日終於要唞唞，最多試過跌返５００幾點轉頭！不過放寬防疫係成個孖屐嘅夢想，如今有啲眉目，唔少孖屐中人都比較睇好後市嘅。

　　睇返今日大部分板塊都要跌，科技佬受花旗國繼續鷹派影響都跌唔少，其中小米（０１８１０）都跌多過兩巴仙。不過小米今日都有少少好消息，據內媒報道，傲芯科技近排完成幾千萬人仔嘅Ｐｒｅ－Ａ輪融資，小米產投獨家泵水，呢一輪融資將用於車內網絡系列嘅晶片方面研發。而喺之前，小米喺２０２１年都投資咗無人駕駛計算晶片公司黑芝麻，今年７月又參與咗雲途半導體幾億銀人仔嘅Ａ＋輪融資。

　　就咁睇來小米吹風造車咁耐，都一直好積極投資喺晶片研發方面，比起新能源車，無人駕駛應該先係小米嘅發展方向。不過就要睇小米方向係點，係要做提供無人駕駛技術嘅供應商，定係要叉隻腳落去一團混戰嘅新能源車行業，如果目標係造一架有無人駕駛嘅新能源車，少不免都同而家嘅造車新勢力拗手瓜。但係睇返每月交車量，其實都開始出現樽頸情況，長江後浪推前浪，連蔚小理都開始突破唔到增長樽頸，小米仲要入場都係唔容易。

　　但係小米一年前已經宣布，喺北京興建總部，計劃分兩期喺亦莊起一座合計產能３０萬架嘅汽車工廠，目前仲起緊。雷軍就話，計劃在２０２４年上半年正式量產，希望成為產量頭五名之一，仲有年幾時間，希望小米架車快啲開出來畀大家睇睇，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。