《小傳日記》歐美芯片加強限制措施,傳阿爺有「過牆梯」應對!

　　《小傳日記》有外電引述消息人士透露,日本同荷蘭「原則上同意」同美國一齊加強對中國出口先進晶片製造機械嘅限制措施。

　　報道指出,兩國可能喺未來幾個星期宣布,將部分採納美國10月推出嘅大規模對中國限制措施,包括禁止出售能夠製造14納米或更先進晶片嘅機械。如果呢單消息係真嘅話,日本嘅「東京威力科創」同荷蘭嘅光刻機巨頭ASML會限制向中國供貨,連同美國嘅應用材料、Lam　Research及KLA,幾乎封死晒中國購買先進晶片製造設備。

　　當然,阿爺呢邊唔會坐以待斃喇,有指中國最近已將美國對華晶片等產品嘅出口管制措施,訴諸世貿組織爭端解決機制。另外,據外電引述消息人士透露,中國制訂緊一項規模超過1萬億元人民幣(折合1430億美元)嘅半導體產業扶持計劃,一方面希望實現芯片自給自足,另一方面係要抗衡美國旨在「減緩中國技術進步」嘅行動。

　　報道指,呢項計劃最早可能喺明年第一季度實施。據消息人士指,主要以補貼同稅收優惠形式,促進中國半導體生產同研究活動,而中國半導體相關公司將有權獲得兩成採購成本補貼。

　　所謂「你有張良計,我有過牆梯」,美國之前都推出過補貼計劃,希望吸引美國廠商返去本地製造芯片。如果阿爺都跟埋一份,到時中芯(00981)、華虹(01347)等芯片公司係咪可以絕處逢生呢?呢場中美芯片戰,未來相信會鬥得非常激烈呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。