《小傳日記》碧桂園都做茅台酒,澄清無關堅定流?

　　《小傳日記》神州一向都有啲話題板塊,成日都吸引到連唔係做開嗰行嘅公司都想分一杯羹。好似內地汽車業就因為有政策長期支持,連舜宇(02382)同百度(09888)等科技公司都會想搞無人駕駛,最新就有傳碧桂園(02007)入局白酒業。

　　身為房地產股嘅碧桂園,睇落同白酒係完全無關。不過碧桂園旗下原來有間「碧桂園創新投資」,據佢官網簡介,碧桂園創投「負責集團除地產投資外所有投資,聚焦科技、消費、產業鏈、健康等主題」。

　　內媒報道,貴州順朋酒業有限公司喺上年12月初成立,法定代表人係李思龍,而李思龍就係碧桂園創投嘅董事總經理。另外順朋大股東係佛山市碧晟企業管理有限公司,而呢間公司疑似實際控制人為周鳳嬋,周鳳嬋都係碧桂園旗下多間金融公司嘅法定代表人。

　　噚晚碧桂園創投就喺微博回應,提到順朋酒業係碧桂園嘅「核心聯盟企業」,專注中高端商務用白酒產品,碧桂園創投就係「獨家財務及戰略諮詢顧問」。碧桂園創投都有解釋點解會踩過界,因為「相較其他消費品,白酒文化屬性更強、品牌生命周期更長,其強社交屬性,也更易形成基於圈層、人群、區域的品牌忠誠度」,簡單嚟講就係「蹭熱度」啦。

　　順朋造酒廠位於白酒嘅「聖地」茅台鎮,附近仲有茅台酒等等白酒界名牌做鄰居。據講順朋目前已經開始向企業客戶做個性化訂制酒品。

　　雖然上面就講咗好多順朋同碧桂園千絲萬縷嘅關係,不過碧桂園就否認同順朋有股權關係,只係屬於上面講過嘅「核心聯盟企業」。至於點解要專登澄清呢?可能碧桂園方面都怕太過高調入局又會引起炒作,所以只係承認碧桂園創投同順朋有關,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。