《小傳日記》QQ視頻號踩入直播帶貨,實力雄厚爭得過?

　　《小傳日記》科技股強勢咗一排,今日終於開始見見哋頂,短線都可能要落一落先。不過都無阻QQ(00700)旗下「微信公開課」圓滿舉辦。

　　「微信公開課」其實就類似座談會,show吓quali介紹有咩做緊,當中sell得最落力嘅就係被馬化騰譽為「全場的希望」嘅視頻號。大會上,官方提到視頻號「要成為微信體系內最原子化的內容組件」,簡單可以理解為無處不在,透過小程序將視頻號連結去唔同微信事業群(WXG)嘅社交媒體上面,包括公眾號、企業微信等等。

　　而QQ咁落力做呢個視頻號,其實都係想追趕住抖音嘅發展。視頻號運作就好似抖音咁不斷向下掃會有由大數據計算出嚟嘅短片推薦,用戶唔經唔覺就睇咗好耐。而QQ更加想做到嘅,就係經視頻號進軍直播帶貨呢一行。直播帶貨有幾好搵,睇見抖音同就快改名嘅新東方在綫(01797)就可想而知,難怪QQ對住抖音、快手(01024)等等直播帶貨對手都要硬闖。

　　不過QQ就係有呢個本錢。有統計報告顯示,截至上年6月,視頻號每月活躍用戶已經超過8億,而抖音同快手分別就係6.8億同3.9億,的確可以人多蝦人少。雖然好似人人都搞直播帶貨,不過其實都唔怕會爭生意,因為做得直播帶貨嘅店主都唔會介意只做一個直播平台,最好度度都有,盡量接觸唔同客群,所以QQ進場亦唔一定代表其他對手會被分薄。

　　有人仲提議可以將視頻號由微信分拆出嚟,令到視頻號嘅商業主題可以更加突出,唔會同微信嘅原有功能起衝突。不過而家視頻號嘅變現能力有幾強都未有正式數據,就睇吓可以幫到QQ業績幾多,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。