《小傳日記》小鵬提到宏大五年規劃,要實現係咪咁容易?

　　《小傳日記》今日魚缸開波跌緊,但之後喺10天線附近頂得住,今日總算升住收工。不過,聽日北水開始唔開,下星期一又放農曆新年假,缸友可能等放假,都無乜mood玩,成交額唔係太多,魚缸當然唔會升到嘭嘭聲喇。

　　今日有隻車股跌住收,講緊係小鵬(09868)。公司之前幾個季度都唔能夠扭虧為盈,聯合創始人兼董事長何小鵬喺年度總結會上提到,小鵬目標係下一個五年中,2025年經營利潤轉正,意味2025年最低綜合毛利要達到17%,銷售規模仲要達到比今日大幾倍嘅增長,到時小鵬嘅人員規模比今日有非常大增長,研發投入肯定年度達到百億級別。

　　何小鵬又指,會喺嚟緊五年加速海外嘅拓展,包括今年有兩款車型喺海外,出年仲有第三款。同時,佢指小鵬一定要積極探索軟件同新商業模式,下一個五年係全自動駕駛,再下一個五年係無人駕駛時代,「如果你想用硬件搵錢,呢個係絕對唔足夠」

　　講到有咁宏大嘅目標,似乎都打動唔到缸友啵,反而公司跟隨Tesla減價嘅消息,令缸友印象扣晒分,大行瑞信更加將美股目標價降低7%,推斷公司今年1月新訂單量依然疲弱。小

鵬今日喺魚缸跌近3巴仙,跌幅已經收窄咗,不過股價仲喺橫行區浮沉,同公司銷情一樣死氣沉沉。

　　但當前同行嘅Tesla已經火燒身,作為造車新勢力嘅小鵬好難甩身,如果依家嘅危機都搞唔掂,何董事長提到嘅美麗藍圖,都可能變成泡湯喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。