《小傳日記》比電受惠消費信心恢復,惟寧待調整吸納不宜高追

　　《小傳日記》尋日恒指喺農曆新年首個交易日再發威,最終升超過500點完場,攻陷22500關口。尋晚美國公布嘅第四季GDP增長勝預期,三大美指皆升,喺冇北水影響下,港股奮力圖強,恒指最高升到22700點。不過,由於下星期二期指結算,北水回歸,而且今天又係星期五,投資者寧願袋錢發個新年財,好過憧憬北水湧入推高大市,點知港股咁升法會唔會變成ATM㗎!上午收市前,恒指升幅收窄到得番廿零點。

　　內地逐步復常,有市場消息話,內地消費信心迅速恢復,由農曆新年旅遊、餐飲同電影票房逐步擴大到電子消費產品,吸引資金流入比亞迪電子(00285),尋日比電就升咗1.25銀,收報28.2元,今朝再升一毫紙,報28.3銀,短期有望向30銀大關進發。

　　不過,睇番技術走勢,28銀確實係有幾大阻力,雖然尋日破位收市,但今朝出現射擊之星形態,企唔企穩都未知。當然,企穩就另計,因為到時28銀會變成強力支持,上面風光無限好,30銀都未必壓得住。不過,依家日線圖9RSI又升到接近75,寧願等調整先買啦,27銀係第一個入市位,26銀可以落第二注,但收低過25銀就止蝕先,目標望住30銀先,如果股價唔跌,直上30銀就放棄啦!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。