《小傳日記》蔚來大減價促銷,最多減十萬人仔平到笑?

　　《小傳日記》新一個月開始,又係新能源車公布銷售數據嘅時候。蔚來(09866)公布今年1月交付8506架新車,包括2190架高端智能電動SUV,以及6316架高端智能電動轎車。不過就無公布按年變幅係幾多,而以上年12月嚟計,交付量按月大減四成六。

　　其實唔只蔚來,連小鵬(09868)1月交付量都按年大減六成,造車新勢力都明顯回塘,所以都迫住要諗諗計。內媒報道,蔚來最新已經將舊年出嘅新車ES6、ES7同ES8都減價促銷,其中蔚來就自己填返之前國家補貼嗰份畀客。另外因為要清貨關係,買存放得愈耐嘅車仲會有唔同嘅優惠package;如果庫存咗超過120日嘅,最多可以有4萬人仔現金回贈;如果擺咗超過三個月嘅,仲會得到過萬銀人仔嘅「服務無憂包」,仲連埋商業保險。當然唔只係得咁多優惠,連埋其他林林總總,集中谷銷量嘅ES6同ES8最多可以平10萬銀人仔!

　　見到蔚來個交付量,同上面花臣盡出嘅優惠package,就可以知道造車新勢力面對緊幾咁凶險嘅境況。如果唔係砸住一堆貨出唔到,又使乜存倉時間愈長就愈多優惠。個個都知道比

亞迪(01211)係新能源車龍頭,最初睇好蔚小理可以有爆發式增長,但係到而家就見到愈來愈大競爭之下,造車新勢力唔只無爆發,仲可能會有炮灰出現。未來其他轉賣新能源車嘅傳統造車大廠,都開始站得住腳嘅時候,剩係造車嘅「新勢力」處境好有可能會更加惡劣,可以做嘅唯有係整到一架真係跑得出嘅代表作,再唔係真係有可能要撈多幾瓣,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。