《小傳日記》契媽唱比特幣十年上一球美金!係咪真係咁牛?

　　《小傳日記》魚缸連跌第三日!10天線、20天線咁穿落去,都就快去到21000大關,都唔知幾時先去到調整底!跌緊嘅話都不外乎撈或者唔撈,「契媽」Cathie　Wood隻方舟之前嗰幾個月就變咗潛艇,契媽都變埋濕柴。近排終於開始加完息,個市升返啲契媽先開始多返啲曝光。

　　早排最叻叻之作就係撈底Tesla成功,上年12月尾嗰排Tesla跌到個個都叫苦連天嗰陣,契媽急流勇撈Tesla,結果Tesla到而家就已經差唔多升返到190美金,以最低價計暫時都已經賺咗七成,算係成功掛返起個招牌。

　　而契媽贏返啲之後講嘢又開始口水多過浪花,方舟近排出咗份研究圾告叫《Big　iedas　of　2023》,當中嘅「idea」真係夠曬大諗頭。其中就話,比特幣嘅長期機會正係增強,就算經歷動蕩嘅一年,但係都無有錯過任何一個節奏點。又話,比特幣網絡基本面已經加強,持貨人好多都開始部署長揸,預計比特幣10年內可以上到100萬美金。

　　其實契媽要睇好比特幣都無話唔好以,一向愛撈底嘅佢見到咁低殘嘅比特幣有心動都唔出奇。不過單憑上面所講嘅話,真係好難相信10年內會升到一球美金。比特幣最多都係上過60000幾銀美金,今年暫時最多都係上到23000銀美金,60000都未到,講100萬真係遠咗少少。如今又唔算有好重大利好消息,純粹跟市升就唱到咁「衡」真係有啲難信服,不過隻方舟而家一帆風順緊,當聽住佢吹水先囉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。