《小傳日記》AI概念炒又炒,知乎可能會大搞?

　　《小傳日記》近日「孖屐」講AI概念股講到興高采烈,百度(09888)講完會整「文心一言」嘅AI聊天機械人之後,好多隻概念股都跟住一齊炒,知乎(02390)就係其中之一。

　　知乎舊年第三季季績顯示,知乎社區內嘅內容量已累計超過5.79億條,問答量累計超過4.82億條,加埋大量用戶點讚投票數據,非常適合用喺開發AIGC嘅大模型。

　　今次AI概念股熱炒,主要因為ChatGPT嘅出現,建立喺龐大數據量嘅訓練基礎上,然後通過引入「手動標註數據」同「強化學習」嚟調整預訓練語言模型,從而大幅提升回答信息嘅準確性。神州主流機構認為,知乎憑藉多年對高質量內容嘅深耕細作,喺數據積累方面擁有天然優勢,喺AI嘅發展相信會幾成功。

　　科技愈嚟愈進步,AI發展都係大勢所趨。ChatGPT喺舊年11月正式發布,短短幾個月已經風靡全球,難怪其他有相關技術嘅公司想大搞。知乎無疑有唔錯嘅根基,有龐大嘅用戶需求,公司亦有充足嘅供應,前景唔錯。不過,依家炒嘅都係憧憬,無咩實際嘅產品出到嚟。知乎如果想大搞AI聊天機械人,都要睇下技術能唔能夠跟得上ChatGPT。

　　今日知乎股價曾經急升超過50%,一日內升咗咁多,依家就真係買唔過喇,唔係話公司前景唔好,只係呢鋪升勢嘅炒作味極濃,利好消息炒到咁上下,可能會有大幅回調。既然係咁,倒不如等佢落番27銀樓下再買喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。