《小傳日記》個個都睇TVB,又係唔係個個都睇好TVB?

　　《小傳日記》魚缸噚日試到上10天線,今日當然就再下一城挑戰20天線,不過信念都未夠強,最後都係未上到,睇怕有兩會好消息前都要捱多陣。

　　話說一直畀孖屐睇淡嘅TVB(00511),今日忽然暴升五成一,以全日最高位5.85銀收市,創超過一年新高。事關TVB早兩日公布,旗下附屬上海翡翠東方傳播同淘寶達成合作意向,今年內將會共同發展超過48場直播帶貨,預計合作可以帶來千萬銀收益。

　　一直被人睇淡,TVB董事近年都出盡法寶刺激業績,先來踩入社交媒體同電商行業,再度喺本業電視內容上下功夫,請「獎門人」返嚟主持大局,都係要做靚盤數嘅決心。不過大改革之後股價都係無乜改善,上年市差嗰排連3蚊都不保,就日日被網民cap低報價嚟「貼堂」,今日爆升五成,都算係一次大洗底。

　　不過今日又係升得出奇,同淘寶合作嘅消息係星期三(1日)收市後出,正路咁利好應該噚日就炒起,不過好似慢咗半拍咁,噚日成交額都係得21萬銀多啲,收升1巴仙多少少,到今日先勁爆炒起五成,成交額成6145萬銀有多,唔通要傾一日先決定要重槌入手?睇返今日成交分析,其實全日都只係得散戶炒,6000幾萬成交額全部都係散戶買賣,十大被動成交券商頭四位都係散戶券商。

　　講起散戶,都係今日,由TVB小股東組成嘅「大台小股東大聯盟」繼之前出公開信插爆TVB之後,最新就公布已集齊人馬,獲得超過5%的股東支持開特別股東大會,將會喺今個月公布詳細事宜。不過今日升咁多,會唔會有小股東趁機食胡算數連EGM都唔開呢?不過今次呢單料都算有啲交代,小股東滿唔滿意就要再睇喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。