《小傳日記》各位觀眾再會,TVB高見8銀就有啲攰?

　　《小傳日記》兩會開幕,不過魚缸都係偏悶,可能暫時嚟講都未有重大利好消息,一切仲要等好多消息落地,暫時都係缸邊你眼望我眼。

　　今日都係睇返隻TVB(00511),上回講到公布完同淘寶合作之後,「大台小股東大聯盟」就同時公布話已經湊齊5%股東同意開EGM,勢要同管理層三口六面講清楚。不過今朝TVB就無懼挑戰,繼續爆上去,最多試過升三成六,高見8銀。不過開市無耐掂完8銀之後就開始有觀眾離場,之後一直落返去開市價上下,最後收報6.41銀,升9.6巴仙,做咗條超長上影線。

　　對於TVB爆升嘅奇景,孖屐呢幾日都有好多唔同嘅討論,其中有人就覺得,雖然同淘寶合作係利好消息,不過都未至於爆到咁樣。而事實上,公告都係一貫嘅TVB風格,寫得好好聽,但係就無詳細講明呢次合作會帶來幾大收益,只係提到會「帶來千萬元級別收益」,9000萬係千萬,1000萬都係千萬,中間都有好大距離。

　　好大程度上炒TVB都係炒消息,覺得同到淘寶合作會有好多發展空間。先唔好講TVB,講返淘寶,巴巴(09988)最新嘅第三財季成績表入面提到,淘寶同天貓嘅線上實物商品GMV按年都錄得中單位數下降。淘寶自己都有困難,TVB同作合作暫時都係得消息面利好,真係有幾大成效都要睇吓場直播出街之後反應好唔好,又可以帶來幾大嘅千萬收入先係真。

　　不過TVB癲炒咗兩日,今日成交額成兩億幾差唔多三億銀,不過TVB都無再公布啲乜,今日咁嘅走勢都係幾得人驚,跟炒之前都要小心,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。