《小傳日記》傳債券持有人敦促許家印拎錢還債,恒大復牌無期?

　　《小傳日記》恒大(03333)自從爆發債務問題而停牌後,內房股經歷咗一段非常低沉嘅時期。近日有外電引述消息人士指,恒大打算喺3月20日(即係下次法院清盤聆訊)之前,公布部分債務重組條款,以尋求將清盤聆訊再次延期。

　　據消息人士指,恒大集團一直試圖同主要離岸債券持有人達成協議,條款包括將部分債務轉換為股權。最新討論包括將部分債務轉為恒大物業(06666)和恒大汽車(00708)股份價格同埋比率。不過,消息人士話恒大已作出「一啲妥協」,但同預期仍然不匹配。據指,債券持有人一直敦促集團主席許家印自己拎多啲錢去還債。

　　恒大債務超過3000億美金,當中境外債佔227億美金。舊年初,集團開始債務重組程序,但據報仲未同債務持有人就細節達成協議。舊年11月,一名債權人提交嘅清盤申請舉行聽證會上,法官命令恒大要喺3月6日左右提供債務重組進度報告。恒大當時同法庭講,目標係最早喺2月底之前攞到債權人對債務重組提議嘅批准。

　　按照依家嘅進度,恒大睇嚟仲要多啲時間先同債權人傾掂數,而許家印傳出畀人催拎多啲錢還債,搞到情況好似變差咗。接連傳出負面消息,呢單嘢睇怕都無咁快解決到,恒大幾時先復到牌呢?相信搵水晶球都未必睇到!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。