《小傳日記》要啃矽銀孖屐唔制?一蚊接手就好抵!

　　《小傳日記》呢幾日全球孖屐當然都係講緊矽銀破產,想當年大家都經歷過雷曼爆煲,忽然一間銀行摺埋都係相當之恐怖!

　　矽谷銀行(SVB)係一間主要做初創創新科技或者生物科技融資貸款嘅銀行,今次執笠,最大影響嘅就係呢類型中小企,或者係一啲做天使投資者等等嘅創業投資公司,而好多都未必係最大型企業,所以影響未算真係好大。

　　矽銀爆煲之後,魚缸裏面好幾隻有存款喺矽銀嘅股份都緊急出聲明,講明自己存喺矽銀嘅錢唔算好多,暫時最多嗰隻騰盛(02137)都唔超過9%總現金量,所以對日常運作嘅影響都

唔大。反而大型創投基金公司反應就大得多,啱啱過去個星期六,包括紅杉資本在內總共125間創投公司發表聯合聲明,呼籲矽銀應當被收購,令到一眾創投可以繼續原有嘅業務往來。

　　就喺美國嗰邊仲係膠著之際,英國已經極速拆掂。今朝就有傳滙控(00005)會收購矽銀英國業務,不過一日之內就已經由傳聞變成真實,仲要係象徵式一蚊英鎊就直接接管。滙控CEO祈耀年就話,今次收購對喺英國嘅業務具有戰略意義,增強對創新和快速發展的公司提供服務嘅能力。結果滙控就由今朝跌一巴仙有多轉為倒升,睇嚟滙控股民都已經接受咗呢件燙手山芋。

　　其實矽銀一直都係創投界嘅重要銀行,今次滙控可以1蚊英鎊接手其英國業務,可以算得上係執到,當然都要係滙控咁嘅級數先可以咁樣極速接手,因為接手之後仲要面對返本身有可能出現嘅擠提,但係只要度過呢一刻,成份矽銀創投融資業務個名都已經好有價值,同時可以幫英國政府解決一大危機,1蚊英鎊係非常之抵,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。