《小傳日記》滙豐開星期一到星期七,同胞市場好賺得?

　　《小傳日記》魚缸今日同噚日都係差唔多,仲等緊美國議息結果,雖然都係預加0.25厘,不過都係睇聯儲局肯唔肯放慢手腳鷹少陣,所以今日孖屐都敢唔輕舉妄動,成交繼續1000億多啲。

　　大象(00005)今日就試玩新嘢,話自從通關復常之後,訪港旅客人數上升,使用分行服務嘅海外港人或者非本地居民都顯著增加,2月非本地居民客戶人數已經恢復至到2019年上半年嘅每月平均數。所以,今個星期六起就會有三間分行試七日營業,包括尖沙咀海洋中心尚玉及卓越理財中心、銅鑼灣柏寧卓越理財中心同埋觀塘分行。不過實際上只係六日半,即係星期六延長服務時間至到5點,星期日就開下晝2至5點。

　　滙豐年初調查顯示,通關之後有六成來港神州同胞都係要處理個人財務,所以點解商界要一直爭取通關。而銀行係開五日半呢個概念不嬲都長存大家心中,而今次滙豐終於打破呢個規定,會開埋星期日,不過暫時只係會服務預約客戶。

　　如果將來銀行真係可以開足七日,就可以避免有時逼住要請半日假,又或者星期六上晝走去排餐懵。不過而家個個都用e-banking,其實有咩事都可以上網搞,普通開戶甚至可以完全唔使入銀行半步,用app就可以搞掂曬,又真係無乜必要必須要全部服務都開足七日,可能滙豐開六日半呢支歌都好難普及到去一般用戶階層,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。