《小傳日記》被傳玩到唔肯走?馬雲地頭打咭證明已返到杭州!

　　《小傳日記》魚缸今日繼續嘗試挑戰返條250天線,不過美團(03690)被QQ(00700)派走令到大批寧願要cash嘅人盡快甩手套現,搞到美團全日第二墊底藍戰士,魚缸自然都升唔到。

　　今日翻波嘅唔只得美團,巴巴(09988)全日高低波幅都成6銀有多!事關今朝《Bloomberg》就報,話馬雲出關雲遊世界之後樂而忘返,唔想返去家鄉杭州。不過神州新班子上場,有傳為咗樹立新班子對民企友善開明嘅形象,阿爺想叫馬雲「愛回家」嚟作為榜樣,但係報道話佢唔願返嚟,結果今朝巴巴就跟住魚缸跌。

　　不過半日未夠,馬雲旗下嘅《SCMP》就出獨家料,話馬雲早就已經嚟過香江睇《Art　Basel》,然後更加已經返到杭州,正面粉碎《Bloomberg》傳聞。報道話,馬雲一返到就特登去咗自己創辦嘅雲谷學校參觀,期間仲提到ChatGPT技術。所以今日臨食晏前,巴巴由84銀左右急彈上到89.95銀。而雲谷都喺官方微信po出馬雲到訪嘅相,證明馬雲真係到此一遊。而馬雲曾經提過ChatGPT,都令到A場AI概念股急彈。

　　其實馬雲都遊山玩水咗三個月,雖然名義上係「考察農務」,不過歐洲、香江周圍走,都去咗唔少地方散心,玩咗咁耐要回程都正路,特別就在《Bloomberg》今朝先報佢唔願返屋企,晏晝前《SCMP》就已經出嚟兜巴星《Bloomberg》,股價都借勢最多升成5個巴仙,但係回落之後再試一次上89.45銀,下晝就一路回落,最終全日都係打個和,報85.25銀。以巴巴牛熊證街貨分布嚟睇,今日最高只係見89.95銀,啱啱好殺唔到90銀熊證重貨區,算係偷襲失敗啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。