《小傳日記》京東孖仔準備IPO!工業定產發邊隻好?

　　《小傳日記》前排京東(09618)就搶先巴巴(09988)搞分拆,一次過宣布旗下京東工業同京東產發一齊交IPO申請表,比起巴巴更加坐言起行。

　　兩隻都正式披露過去幾年成績表,其中京東工業規模比起京東產發大得多,2020、2021同2022年收入分別係68億、103.45億同141.35億人仔。雖然由2020年有純利3.43億銀,到2022年虧損13.34億銀,不過扣除可轉換優先股公允價值變動等因素,經調整純利三年分別係4.37億銀、5.01億銀同7.15億銀,都係逐年上升。

　　京東工業係提供工業供應鏈技術嘅公司,主營B2B業務,為企業客戶提供供應鏈解決方案,整合自營與平台兩種模式,協助客戶管理公司庫存。京東工業本身以提供服務為主,自己唔會有太多硬件上嘅庫存。招股書提到,京東工業預期未來將會擴大技術基礎設施、擴大現有市場的客戶群並開拓新市場,以及繼續就自身平台進行投資和創新,代表公司仲係處於擴張階段,增長可期。

　　所以兩隻相比嚟講,京東產發著重硬件開發,主要以發展物流園區為主,將佢視為地產股仲貼切。京東工業就著重處理供應鏈服務,相關嘅硬件配套可以轉交畀京東物流(02618)同京東產發,對於京東工業嘅資金流動性亦更加大,比起京東產發更加值得期待,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。