《小傳日記》日本用過千億開賭場,澳門博企點應對?

　　《小傳日記》近期日本政府宣布,批准喺大阪興建賭場度假村。呢個度假村會喺一個叫做夢洲嘅人工島上面,起初成本係1.8萬億yen(約1067億港紙),係日本第一次批准起賭場度假區。

　　首相岸田文雄話,希望度假村喺2029年秋冬開業,年收入目標5200億yen(約308億港紙),主要嚟自博彩業,並且希望每年吸引600萬個國際遊客同1400萬個本土遊客。佢又聽取專家組嘅意見,專家組指喺經營者財務穩定性、地區經濟效益,同埋打擊賭博成癮措施等,由大阪府同大阪市提出嘅發展計劃可以滿足既定條件。

　　面對日本突如其來嘅挑戰,澳門博企點還擊呢?金沙中國(01928)就話,澳門擁有集群效應,有唔少賭場聚集,加上去日本需要一個比較長嘅假期,內地旅客去澳門比較方便,香港旅客佔嘅比例都幾大,唔太擔心日本起賭場對澳門賭企收入帶嚟好大影響。金沙又話,旗下業務會喺日本賭場開業之前做好部署,目前仲有6至7年時間準備,改善設施同起更多具吸引力嘅地標,澳門六大博企甚至承諾喺未來10年投資過千億。

　　澳門係亞洲嘅博彩重地,博彩業嘅知名度同配套暫時比日本優勝,呢個地位相信幾難動搖。

更何況,今次日本政府揀喺大阪起賭場,雖然當地有好多知名嘅觀光勝地同娛樂景點,但據日本傳媒指,有當地居民反對起賭場,亦有人擔心賭博成癮嘅問題,呢個鴻圖大計係咪咁易落實呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。