《小傳日記》傳緊上市嘅盒馬鮮生,原來唔同去開間快馬鮮生?

　　《小傳日記》今日又有傳巴巴(09988)旗下六大業務之一嘅盒馬鮮生準備上市,不過最快都要下年,而家就正係同中金同大摩傾緊搞IPO,而最終係咪真係上都未定。有神州記者打去問盒馬鮮生,結果就係對市場傳言不予置評,即係無認又無否認。其實巴巴宣布分家之後,孖屐最睇好可以搶先上市嘅就係阿里雲,不過之前傳完菜鳥而家又傳盒馬鮮生,都唔知邊句真,所以今日巴巴都無乜郁動。

　　講返隻盒馬鮮生,logo係隻河馬,其實就係「盒馬」嘅普通話諧音。據巴巴截至上年12月底嘅第三季成績,直營及其他收入按年多一成至744.21億人仔,主要就係受惠於盒馬同阿里健康(00241)收入增長強勁,其中盒馬更加錄得雙位數同店銷售增長,就咁睇上市都唔會太失禮。

　　盒馬鮮生係新鮮食品超市,而香江呢邊都有間「快馬鮮生」,logo係隻馬仔,以為同隻河馬係表親就大錯特錯!原來「快馬鮮生」同「盒馬鮮生」完全唔同,盒馬2015年成立,快馬就2018年先成立;盒馬係巴巴親生仔,而快馬就係由來自福建嘅林煜銘創立。

　　呢間「快馬」喺香江分別喺屯門、紅磡、將軍澳同石門都有分店,據講連新加坡都有門市。

不過搵勻都唔係好見到快馬更加多嘅背景,反正就係一間個名同盒馬好似嘅超市,搶先盒馬登陸香江。之前屯門店新開張,有唔少街坊好明顯誤會咗以為「快馬」就係「盒馬」,仲將「快馬」同上面嘅「盒馬」相提並論。

　　但其實有幫襯開「快馬」嘅街坊,唔好搞錯自己幫襯緊巴巴旗下嗰間,唔好等第時「盒馬」上咗市以為係自己幫襯開嗰間,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。