《小傳日記》驚唔夠阿里巴巴爭?騰訊雲宣布減價40%!

　　《小傳日記》騰訊(00700)就嚟公布業績,今日股價即使跌住收,好彩都唔係跌好多啫。集團旗下手遊「王者榮耀」4月全球收入2.13億美金,蟬聯全球手遊暢銷榜冠軍,另一款遊戲《PUBG　Mobile》就以1.54億美金嘅收入位列第2名,騰訊嘅遊戲影響力仲係好勁呀。

　　不過,騰訊嘅雲業務最近有件唔係太好嘅消息。騰訊雲宣布會減價,受影響嘅產品包括雲服務器、雲網絡、數據庫同雲安全,減價幅度介乎15%至40%。其中,騰訊雲主機安全基礎版會對全網中小企業免費開放,同時免費開放資產管理同一鍵體檢能力。騰訊雲總裁邱躍鵬話,今次減價係要「進一步向用戶釋放技術紅利」。

　　其實,騰訊雲唔係第一間公司宣布減價。上個月26日,阿里巴巴(09988)旗下阿里雲宣布史上最大規模嘅減價,核心產品價格全線下調15%至50%,存儲產品最高減價幅度達50%,5月7日生效。阿里巴巴董事會主席張勇當時話,減價主要希望「將技術紅利更多回饋畀客戶同夥伴」,持續降低用雲成本,擴大雲嘅市場空間。

　　你減完,我又減,大家爭住減價,可能因為競爭激烈。有分析指,減價戰主要目的係「以價換量」,擴大用戶基數同規模,而呢種價格戰係一種迫不得已嘅手段。分析又指,依家雲服務市場好難再一家獨大,競爭變得愈嚟愈激烈。另外有報道指,今次重啟價格戰,可能近期企業嘅雲需求較為旺盛,而價格戰只係「短期內搏鬥嘅利刃工具」。

　　真係估唔到早排新能源車不斷減價,依家連雲企業都要打減價戰。呢輪減價戰時間雖然未必太長,但足以反映雲業務嘅競爭相當激烈。騰訊未來唔止要睇手遊同廣告業務,大家要留意埋雲業務嘅表現呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。