《小傳日記》未嗌單先派三百?美團旗下KeeTa今朝正式出發!

　　《小傳日記》講咗咁耐,一向只係喺魚缸見到嘅美團(03690)終於可以喺街見真身,今日起美團旗下嘅港版app「KeeTa」今朝8點正式推出,首階段只送旺角至大角咀區,預計年底先會送勻全港。

　　美團港版KeeTa象徵顏色用返美團一向嘅鮮黃色,不過「KeeTa」字體方面就同美團體有唔同,感覺再活潑同更加有外國feel。攻港初期,KeeTa大派優惠吸客,推出「十億激賞計劃」,每位新登記用戶都可以有總值300銀嘅現金券,包括專區優惠券、驚喜「額滿」優惠券、免運費券等。除咗「迎新大禮包」,KeeTa仲會每日隨機派優惠券,「日日有著數」。

　　美團要喺已經被熊貓同袋鼠佔領嘅外賣市場爭食,絕對係要以平取勝,所以整體收費上都平過兩大平台。以最低訂單金額計,熊貓、袋鼠同KeeTa分別係80銀、75銀同60銀,KeeTa係當中最平。另外,KeeTa仲有「超時包底」政策「準時保」,當張單遲過預計最遲時間嘅15分鐘之後,符合條件嘅單就會獲發唔同金額嘅補償優惠券。

　　美團攻港會唔會成功都仲要睇大眾嘅反應,但係見到美團都好積極針對兩大平台嘅弊處嚟入手,包括運費貴、小額訂單費同遲到問題嚟出手,如果真係解決到呢啲問題就有望成功企穩陣腳。不過前車可鑑,當日都見到Uber　eats係點樣敗走,可以知道要撼動到釘實咗嘅熊貓、袋鼠都唔容易,KeeTa要搶「孖屐些牙」仲有好長路行,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。