《小傳日記》張勇全力專注阿里雲,阿里系之中最值得留神!

　　《小傳日記》魚缸又偷偷哋出現暗湧!神州人行下調LPR,不過唔知係咪孖屐覺得唔夠皮,魚缸晏晝最多跌超過400點,連條250天線都試穿過,全日成交都唔夠1000億銀!

　　不過就係呢段時間,巴巴(09988)重組就如火如荼。今朝就有傳張勇會卸任董事會主席兼首席執行官,傳咗一朝早,到晏晝終於證實,由張勇向全體員工出公開信,話自己將會喺今

年9月10日卸任巴巴董事會主席兼CEO職務,副主席蔡崇信接任主席,吳泳銘接任集團CEO,同時繼續兼任淘天集團董事長,而張勇就改為專注做阿里雲集團董事長兼CEO。

　　張勇公開信提到,雲智能集團完全分拆工作已經啟動,正係處於最關鍵時刻,考慮到分拆過程中公司規範化治理嘅要求,所以就唔適宜同時擔任兩間集團嘅董事會主席。佢又話,蔡崇信同吳泳銘都係巴巴嘅創始人同合夥人,對巴巴發展史有重要貢獻,相信喺佢哋領導下,公司可以走向更輝煌嘅未來。

　　同時間,又有內媒報道,巴巴六大業務之一嘅大文娛方面,阿里巴巴文化娛樂有限公司今日全資成立咗神力視界,註冊資本為1億銀人仔,法定代表人為鄭勇,亦即係阿里大文娛嘅首席技術官。神力視界經營範圍將會包含人工智能應用軟件開發、文藝創作同廣播電視節目製作等等。

　　就咁睇,張勇唔再做巴巴主席,好明顯就係想將六大業務集團劃清界線,真正成為六個獨立間司。張勇去做阿里雲主席而唔係做巴巴主席,相信巴巴內部目前對阿里雲呢一瓣應該係最重視,亦都應該係巴巴身為科技公司,技術最頂尖嘅一部分,所以先會要張勇親自坐陣。所以相信嚟緊三間阿里系上市,阿里雲應該就係最值得期待,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。