《小傳日記》BYD法務部開微博,話博主惡意詆毀證據確鑿!

　　《小傳日記》BYD(01211)身為大藍籌,連公司部門都有自己微博。BYD法務部官方微博正式成立,開門第一炮就公布,已經正式起訴微博博主「龍豬-集車」。

　　BYD法務部就話,「龍豬-集車」長期發布大量不實信息,惡意詆毀、貶低侮辱BYD,對品牌聲譽造成嚴重損害,所以就正式起訴「龍豬-集車」,要求佢刪除侵權言論、公開道歉兼賠500萬人仔。

　　「龍豬-集車」就係喺微博活躍嘅汽車KOL,平時主要博文都係講車為主。而龍豬-集車原來早喺6月已經被微博禁言,據帖文入面其他用戶留言來睇,龍豬-集車近期主要都係唱好緊造車新勢力之一嘅魏牌新出嘅藍山,但係就應該平時成日都會出一啲不利BYD同長汽(02333)嘅消息。其中6月底就出過一張BYD車喺路中心停低嘅相,來瘀BYD嘅造車質素。

　　睇返呢個Post下面嘅留言,都唔係一面倒一齊笑BYD,都有人為BYD講兩句,問龍豬-集車究竟係有幾想造低BYD。因為疑似龍豬-集車一向都係吹奏魏牌為主,都有人覺得佢係魏牌打手所以成日要出BYD同長汽嘅黑材料。仲有人提到,其實張相都已經係舊相。

　　不過如果真係被人搵到咁多黑材料,係咁BYD都要注意下,雖然龍豬-集車微博入面都不乏支持BYD嘅人,不過都有人講到有關BYD電池、車輪等等嘅問題,甚至有人提到買完BYD投訴無門,所以都真係應該要留意。

　　而BYD法務部都呼籲,如果有網友搵到其他涉嫌侵權、涉嫌收受他人利益侵害BYD權益嘅信息,經BYD查證屬實並得到相關司法機關認可,BYD仲會按價值提供5萬至500萬人仔嘅獎金。而今次都係神州新能源車競爭激烈嘅其中一次事件,已經上到揭黑材料地步,發改委先啱啱出完措施希望穩定和擴大汽車消費,太黑材料互揭都唔係做大個餅嘅好方法,都難怪BYD要開始揸正來做,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。