《小傳日記》MEME股容易炒燶?話題股都可以有ETF追蹤?

　　《小傳日記》早排美股一路強勢,到噚日惠譽忽然「驚喜」將美國降級,拖累美股大冧,道指終於都要跌鑊甘。不過就連隻MEME股Tupperware(特百惠)都要跌埋一份。

　　臨近7月尾,同魚缸一樣,美國老牌塑膠食物盒品牌特百惠(TUP)忽然炒起,仲要係單日幾十巴仙咁暴升,7月24號就升咗七成半。最後就由7月21號嘅0.6654美金,炒高到8月1號嘅5.38美金,暴升咗七倍,不過噚日美股大跌,TUP都跟住回吐三成有多。

　　而背後有乜原因呢?其實就係無乜原因,美股會叫呢類股做MEME股。同MEME一樣,都係因為一啲無厘頭原因就會爆紅,MEME股爆升都可以係無緣無故,可能係因為成為網絡熱話,當年GameStop(GME)就係散戶對決金融大鱷而成為MEME股,不過到今日為止,都未知係咩原因令到TUP爆升。

　　魚缸都曾經有唔少有MEME股感到覺嘅股份,譬如東方甄選(01797)上年啱啱轉行直播帶貨,嗰種大爆升就好有MEME股味,令到今年先跟風搞直播帶貨嘅TVB(00511)都可以MEME股式炒起。

　　通常魚缸有唔少人都會叫大家唔好染指呢類MEME股,因為爆升背後都自然有浸妖股味,隨時跌返轉頭。不過美股就反而有追蹤話題股嘅ETF,就係BUZZ。BUZZ追蹤嘅指數係BUZZ　NextGen　AI　US　Sentiment　Leaders　Index,可以簡稱為社交情緒指數,呢個指數會用AI來揀出目前最高討論度嘅75隻股份,每個月會調整一次。但係為咗避免波動,反而就會避開一啲未成氣候嘅MEME股,限制入選企業嘅市值唔可以低於50億美金。

　　講到尾MEME股升快,但係都跌得快,入得手都係博,所以要睇清楚囉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。