《小傳日記》打正旗號「交個朋友」,同東方甄選仲係唔係朋友?

　　《小傳日記》上月就啱啱有隻股份,世紀睿科正式改名叫交個朋友(01450),本身以為又係一隻改咗個有趣名嘅股,不過原來交個朋友本身就叫「交個朋友」。

　　今年5月,世紀睿科宣布已經完成對交個朋友嘅全資收購,之後就擁有交個朋友嘅核心IP同相關嘅全部帳號。但係其實早多兩年前,交個朋友原本有意同A場尚緯股份(滬:603333)合作,將40.27%股權直接出售,但隨後被監管部門查詢,最後就撻Q,而今次就疑似成功以世紀睿科借殼上市。

　　其實交個朋友係直播主羅永浩本身喺抖音嘅直播間,最初係因為羅永浩自己創立嘅錘子科技資不抵債,結果執笠,揹住成身債之下唯有2020年3月開始下海做直播帶貨,先成功賺到錢還債。嗰年6月就試過想借尚緯股份來完成上市,不過都係唔成功。到上年6月,交個朋友先開始轉移目標至世紀睿科。

　　不過為交個朋友泊好個碼頭之後,羅永浩嘅創業魂始終不死,宣布將會由交個朋友淡出,轉投自己嘅事業。雖然到而家都仲會間中直播吓,不過比起高峰期已經少咗好多,所以剩低仲喺交個朋友入面嘅管理層都要宣布正式由「世紀睿科」改返名,打正旗號做好盤生意。所以目前交個朋友都算係東方甄選(01797)嘅最大對手。

　　講起東方甄選,羅永浩同新東方(09901)都好有淵源。原來早喺2001年,羅永浩都曾經係新東方嘅英語講師,當年羅永浩嘅講書風格都出名生動有趣,佢都係嗰時開始喺網絡出名。睇返而家東方甄選都係靠中英雙語帶貨上位,如果羅永浩仲喺新東方,可能成績會比而家更好,可惜係錯的時間對的人!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。