《小傳日記》杭州亞運睇電競!QQ都開間電競酒店咁勁?

　　《小傳日記》杭州亞運今個月就開幕,今次最特別就係加入咗電競作為比賽項目,一共會打7款game,包括《王者榮耀》、《Dota　2》、《夢三國2》、《EA體育足球》、《LoL》、《和平精英》同《街霸V》。身為遊戲龍頭嘅QQ(00700)當然有吼準呢次機會,於是就喺杭州開咗間「競鵝酒店」。

　　原來早喺上年7月,騰訊遊戲副總裁兼電競總經理侯淼就提出「數字IP+城市商業場景」,宣布由騰訊電競同歐愉科技共同成立「競鵝酒店」。酒店風格都係貫徹電競感覺,以cyberpunk為裝修主題。而競鵝更加活用AI,創造咗神州第一個可以互動嘅虛擬酒店主理人VEEGY,全個入住過程都會由VEEGY帶領。

　　而競鵝身為電競主題酒店,當然唔會只單有主題,有得打機先係王道!競鵝每間客房都有按人數嘅獨立超高速電腦,屈喺房打足全日機都無問題。而QQ本身已經有咁多個遊戲IP,所以都將旗下唔同遊戲由線上變成線下,都會係住客嘅體驗重點。而唔識打機都唔緊要,競鵝入面超過1000平方米嘅電競娛樂空間,提供手速、眼力、策略等等嘅職業級電競天賦測試,試吓自己有無成為電競選手嘅潛質。

　　雖然好似好創新,不過原來電競酒店都唔係QQ開創嘅新玩法,有機構就估計,2022年神州電競酒店嘅總資產值會超過600億人仔,2026年將會翻一番達到1200億人仔。有業內人士就話,電競酒店提供嘅私人集體打機空間以及多元化嘅娛樂功能,又進一步刺激咗年輕人嘅社交需求。之前同程就發布咗《2022電競酒店市場研究報告》,截至上年6月,全國總共有1.1萬間電競酒店,預計今年更加會突破2萬間。

　　原來慢慢由打機就已經引申多個新興行業電競酒店出來,不過如果全國有成兩萬間以上,需求又係咪真係咁大呢?QQ咁大牌子應該都企得住,其他細牌又係咪咁易企到真係話唔埋,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。