《小傳日記》唔使兩嚿就可以做會員?實情最著數係東方甄選!

　　《小傳日記》神州今朝公布第三季GDP,按年升幅4.9%,好過預期嘅4.4%,合共頭三季GDP增長5.2%,暫時睇來全年保5都仲係有可能!

　　不過經濟改善還經濟改善,魚缸零售消費股就係炒極都唔起,先唔講有亞運利好都唔郁嘅體品股,其他餐飲股、食品股都係愈炒愈燶,就連今日出完GDP都反應唔大,就知成個板塊嘅頹

廢程度。不過以前讀經濟都有教,當市況唔好,就正係inferior　good(低檔商品)發圍嘅時候。唔知係咪咁,造就咗東方甄選(01797)呢兩個月都跑贏零售消費板塊。

　　而近期東方甄選就推出咗會員制,年費199人仔,包全年自營品88折、一年12張會員券同埋66銀人仔入會禮包,再包埋全場商品5倍積分,最重要就係,會員制標明「不滿意隨時退」。點退法呢?原來假如會員一年內無嘆足199銀優惠,就可以以現金形式退還剩餘年費,即係最少199銀quota,用唔曬仲有得回水。

　　可以話退就退,用唔曬仲有得回水,對消費者來講好似真係無乜蝕底嘅地方。不過對東方甄選來講,一來會員年費可以袋袋平安,二來最重要就係大數據。登記會員之後,每個會員都買過乜嘢都會有紀錄,自然用ranking都可以將會員最會有興趣嘅嘢置頂畀佢,呢啲唔係新鮮事,對於東方甄選制定策略會非常有幫助。所以平嗰少少,仲要收埋年費,反而東方甄選先係又食又拎嗰個。

　　近期東方甄選35銀都企得幾硬,現價36銀或以下都可以考慮吼吼。東方甄選11月底係財年中期,今次會員制可能好有機會可以推一推中期業績表現架,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。