《小傳日記》安踏換新標誌,純粹加多粒字?

　　《小傳日記》魚缸反彈,不過成交繼續奀,睇怕都係彈一日跌一日,要真係回升可能未有耐!不過跌咗好耐嘅體品股都算借住升勢有得彈吓,安踏(02020)同李寧(02331)今日都叫升住完場。

　　其中安踏前日就啱啱宣布要轉logo,都唔係咩大變動,不過起碼都見到有唔同,點都抵換過小米(01810)早兩年使逾兩球人仔就只係將直角變圓角。今次最大變動就係喺原有logo下面加返品牌英文名「ANTA」,顏色就轉咗用比原本紅色更搶眼嘅鮮紅色,整體睇落係清晰咗同多咗活力。

　　據講安踏logo靈感係來自排球扣球嘅姿勢,而「Anta」喺希臘文係「大地之母」嘅意思,logo就係由個「A」字變形,再設計得更加有飛躍感覺,強調速度同流線型。

　　因為要表達流線型,對手李寧(02331)嘅logo設計意念其實都差唔多。李寧logo都係全個紅色,形態就係用咗「Li　Ning」嘅「L」同「N」字母變形而成。同安踏都算異曲同工,都一樣係由左至右劃咗一條長尾來表現速度。

　　而最相同就莫過於大家都一樣係用紅噹噹嘅鮮紅色。運動牌子logo通常都用暖色系,包括埋特步(01368)、滔搏(06110)同361度(01361)都唔係紅色就係橙色、黃色,當然就係要強調運動嗰種熱度感覺。而最重要,紅色就係代表神州嘅顏色,一見紅色就會聯想到國家。早幾年安踏、李寧乘國潮風吹起而一帆風順,可能都同大紅logo嘅象徵意義有關。

　　不過國潮風吹完,安踏同李寧隻船都駛得慢咗,股價都跌跌不休。logo繼續鮮紅,銷售又有無得長紅呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。