《小傳日記》瑞幸賤價搶市佔,小型cafe可以點?

　　《小傳日記》神州咖啡品牌瑞幸早幾日公布第三季業績,營收按年賺多八成半到72億人仔,連續第二個季度超越Starbucks中國。但殺敵一千嘅背後就係自損八百,瑞幸第三季毛利率得13.4%,低過上年同期15%兼上季嘅16.2%。不過瑞幸董事長兼CEO郭謹一就話,市佔係公司頭號目標,更加預告毛利率仲有機會進一步下降。

　　事實上,神州經濟環境唔好,各行各業都受累於消費信心下降,為保生意難免都要打減價戰。有內媒就引述咗唔同報章報道,發現今年以來好似瑞幸等嘅連鎖品牌發起減價戰,現到9.9銀人仔一杯咖啡,令到其他小本經營cafe被迫跟隨。

　　瑞幸老闆講明,不惜毛利率下跌都要搶市佔,講白啲即係要以本傷人,不過在商言商又無得怪啲咩。有小型cafe店主向記者大呻,自己前腳開舖,瑞幸同庫迪兩大龍頭就後腳打孖咁嚟喺佢附近開舖,明乎其實就快被「夾死」。佢話兩大龍頭殺到之後,生意額直接擘半,被迫跟住一齊賣9.9銀、8.8銀人仔一杯,但馬上就開始蝕錢。

　　雖然神州咖啡已經陷入近乎「賤賣」狀況,不過實際上環球咖啡售價正係節節上升。今個月初,全球阿拉比卡咖啡豆庫存一度跌至24年以來新低,令期貨價格一度彈升4%。咖啡豆價格上升,但係神州咖啡愈來愈平,正如上面所講,有唔少小型cafe面臨「夾死」,即係話神州咖啡已經供過於求,亦面臨汰弱留強時代。

　　反觀香港嘅市場,咖啡早就飛入一般百姓家,對於普遍連鎖cafe嘅latte、americano同cappuccino,更多好啡之徒轉移尋找更加有個人風格嘅單品咖啡同精品咖啡,鑽研唔同產地咖啡豆之間嘅分別。如果神州小型cafe要殺出一條血路,精品咖啡又可唔可以另闢蹊徑呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。