《小傳日記》理想出新車「MEGA」,好用唔好睇因為太大架?

　　《小傳日記》神州車市愈來愈白熱化,其中造車新勢力得理想(02015)跑出,由以前叫造車新勢力,到今日可以同龍頭BYD(01211)並駕齊驅,證明理想嘅高端策略成功,賣得貴都唔代表無人買。

　　理想最近又準備出新車,旗下「理想MEGA」將會喺今個星期五(17號)廣州車展首度登場,同時開始預訂,預計出年2月開始交車,孖屐估計埋單一架盛惠50萬人仔!之前理想方面就將新車形容做「高鐵」,而官方預告圖都見到,個車頭仲成架子彈火車咁,老闆李想就叫大家「直接猜風阻系數」。由側面來睇,的確係由車頭一條流線到車尾,唔知係咪真係有子彈火車咁嘅速度嘞。

　　據講理想MEGA將會配備寧德時代500千伏嘅5C麒麟電池,叉電9分半鐘就可以行足400公里,據講去到充電站仲會有充電機械人來為您服務,唔使自己插電。而理想MEGA貫徹內櫳大嘅車型,大大架,長5.3米闊超過2米,高度超過1.8米,而最多可以有成8個位,即係一家四口,再加埋四大長老都可以一架車裝曬!

　　實用就真係實用喇,成架van仔咁大,不過如果唔係大家庭組合就會嫌佢成隻大笨象咁,雖然流線型,不過真係太笨重。有網站就發起投票,問大家對MEGA外型滿唔滿意,不過就有

成一半人都頂唔順佢大件頭。老實講,對於鍾意靚車嘅買家來講,理想嘅出品都好難會令佢哋滿意,始終理想一路就係主打多位又實用。不過人某階段開始就好難追靚唔靚,好睇唔好使只會被人嫌棄,用得到先最實際,而理想業績愈來愈好都證明,夠好用先最重要,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。