《小傳日記》開拓藥業再次開拓唔到,又再撻Q恐怕兩蚊不保!

　　《小傳日記》魚缸成交淡靜,不過今日隻開拓藥業(09939)就有差唔多2億銀成交,合共差唔多8600萬股,創2021年底以來新高,但係成交咁大就要大跌三成二,最低見過2.01銀上市新低!

　　事關今朝開拓就出公告,旗下醫治療脫髮同痤瘡嘅外用藥物KX-826,完成第III期臨床試驗結果之後,雖然發現KX-826試驗過程期間無重大不良反應,又成功促進毛髮生長,但係就同安慰劑組未達統計學上嘅差異顯著性,換句話講即係用藥安全但係無乜用。

　　「未達統計學上差異顯著性」係醫藥股試驗結果通告嘅常用字眼,因為科學實驗入面係需要做對照實驗,所以通常會有兩組實驗對象,一組係用真藥測試,另一組稱之為對照組就會用一款

望落同真藥好似嘅藥,稱之為「安慰劑」,但係就唔具有受測試成分,而兩組受試者都唔會知道自己係用真藥定安慰劑。所以當同安慰劑組「未達統計學上嘅差異顯著性」,近乎就係研究失敗嘅意思。

　　事實上開拓都唔係第一次開拓唔到新藥,早兩年新冠疫情橫行,開拓都有份研發新冠藥物,係新冠概念股之一。不過2021年底時就公布,旗下研發嘅新冠藥普克魯胺同樣係第III期臨床試驗進展中期分析「未達統計學顯著性」,於是當日股價暴瀉七成,成交超過9200萬股,至今仲係最大成交量嘅一日,而今日就係僅次嗰日嘅第二高成交量一日。

　　「第III期臨床試驗」其實係藥物研發進程入面,距離新藥上市申請前嘅最後一步,偏偏開拓兩次都係臨門撻Q,引發股價大跌。

　　KX-826同普克魯胺都係透過阻截雄激素對身體嘅影響從而發揮功效,可以見到開拓嘅主項就係研究阻截雄激素,但係呢兩隻藥都曾經喺第III期臨床試驗撞板,難免令孖屐大失所望。雖然普克魯胺後來有報告顯示治療非住院新冠輕中症患者顯示有效降低住院或死亡率,不過至今仲未有國家地區批准普克魯胺上市,直至今年6月底公司仲係未有任何收益。

　　如今公司嘅「全村人最後希望」KX-826撻Q,令開拓距離有收益又遠一步,更加唔好講「甩B」,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。