《小傳日記》拼多多業績股價升爆燈!全因為安守「本分」?

　　《小傳日記》近呢幾日雖然魚缸無乜睇頭,美團(03690)、巴巴(09988)接連出嘅業績都令人心淡,不過無喺本地魚缸上市嘅拼多多(US.PDD)份業績就眼前一亮,美股嗰邊升到撼撼聲,相反本地魚缸就只可以求吓隻美團守住90銀。

　　拼多多第三季收入勁升九成四去到688.4億人仔,比預期嘅548.7億人仔多成140億人仔,可以話係大勝預期,甚至乎已經係另一個程度。近兩日嘅市場熱話都一定包括拼多多更因為績後爆升,市值一度超越巴巴。

　　雖然拼多多同阿里都係電商起家,不過拼多多係神州市場入面少數專注於電商嘅企業,成個巴巴六大業務夾埋先有1900億美元市值,而拼多多只係電商業務就已經達到1883億美元市值,背後係絕對嘅硬實力。

　　拼多多嘅核心價值係「本分」,即係「堅守自己的本職」。創辦人黃崢講過:「本分就是首先要搞清楚自己的定位,為誰創造甚麼樣的價值,依賴誰活著,自己的職責是甚麼。」相信就係呢個「本分」,令拼多多咁耐以來都只做電商,當其他神州科技巨頭發展元宇宙、AI模型,拼多多都未試過跟風。公司現任董事長兼聯席首席執行官陳磊就話,公司應對競爭唔係睇對手做咩,係睇消費者要咩。

　　可能都係呢一個「本分」嘅核心價值,令到拼多多過去以來要面對嘅監管壓力都細得多,唔會好似其他巨頭一樣百足咁多爪,「多手」就反而招來事端。另外,早年幾前嘅中概股回H潮都無令拼多多回流,繼續只係以納斯達克為單一上市地點,可能都係咁令到外資覺得拼多多會較為唔受脆弱不堪嘅中港股市氣氛影響,而更加願意入手拼多多。

　　成王敗寇,唔同發展策略自然帶來唔同遭遇,拼多多成立至今只係8年時間,未來嘅增長速度固然係會比ATM為多,亦更值得期待,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。