《小傳日記》瑞幸的不幸!告輸侵權以後要審慎!

　　《小傳日記》瑞幸今年以來靠「醬香拿鐵」喺神州都攞返唔少名氣,雖然毛利因為減價戰而受壓,但係管理層就解釋係搶市佔嘅策略,整體都係積極擴張中。不過近期就喺泰國遭逢「不幸」,告人侵權結果敗訴!

　　瑞幸近期喺泰國對泰國皇家50R集團提告侵犯商標版權,不過50R兩年前就喺泰國搶先註冊瑞幸品牌商標,至今已經開咗十幾間分店,中國瑞幸最終被當地法院判處敗訴。有唔少媒體

都報道,遲過人註冊故然係瑞幸打輸嘅最大主因,但更重要係50R集團係具有有泰國王室同軍政府背景,瑞幸基本上未見官已經先打三十大板。

　　搶先註冊呢一招喺神州非常普遍,之前嘅案例就有Jordan、無印良品,都係海外原版因為遲咗註冊而喺侵權案敗訴,當中無印良品更係被起訴侵權罪成,結果今次就輪到神州企業喺海外撞返同樣嘅板。神州冒牌公司通常都只會將個logo做得好似,但都未至於一樣,但係泰國瑞幸「參考」起上來都好唔客氣,logo上面隻鹿同中國瑞幸基本上係一模一樣,只係左右鏡面反轉咗,就好似原版隻鹿被人冚一巴望咗去另一面。

　　搶先註冊呢一招以往都係喺神州見得多,喺海外地方竟然有人用同一招實屬少見。以往呢一招都令唔少小企業成功崛起,好似長年被詬病「logo似Uniqlo、產品似無印良品」嘅名創優品,喺南美洲市場有唔少消費者都以為名創優品係日本牌子,甚至係日本人都以為係。搶先註冊呢招令好多小型企業得以借助原版名氣擴張,如今本土企業正係海外擴張,反而被同一招反制,相信未來神州企業海外擴張前都要多加注意,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。