《小傳日記》東方甄選日日道歉都無補於事,歸咎於公關太低層次!

　　《小傳日記》最新消息,東方甄選(01797)嘅粉絲人數下跌速度堪比恒指跌幅,五日時間已經唔見足足32萬人,股價今朝雖然高開,不過之後都係繼續跌,收市仲係要跌近6%,可以見到「丈母娘」行動絕對唔係講玩。

　　噚日東方甄選老闆俞敏洪已經出面道歉,提到原本一單小事,因為處理不當而變成洶湧澎湃嘅輿情。回顧返成件事嘅豬隊友就係東方甄選小編,當「丈母娘」質疑緊嘅時候,董宇輝出來撲火,話係小編「胡回復」,小編反而再駁嘴話無「胡回復」,堅持吉林專場小作文係自己手筆,反而就更加辣興「丈母娘」保護偶像嘅心態,先引發今次事件。

　　俞老闆道歉段片都提到,今次小編做法係嚴重缺乏職業精神,也講明公司管理上有好大漏洞。對於CEO孫東旭解釋嗰陣提到董宇輝薪酬,亦都係唔恰當,自己身為董事長都有責任,亦已經向董宇輝表達歉意。

　　今次爭論嘅一個重點,就係對於東方甄選對於台柱董宇輝嘅待遇唔夠好,真實年薪其實係唔夠千萬。的確董宇輝同其他東方甄選主播並唔係同一個層次,當其他主播抖音粉絲人數以百萬計,董宇輝早已經突破千萬;其他主播開播有600萬、700萬人收睇,董宇輝一開播就過千萬。

　　雖然東方甄選唔想單靠董宇輝搵食,但而家未變得到嘅時候,都要保住公司最大嘅救命稻草。好似隔籬行嘅樂華娛樂(02306),旗下王一博紅透半邊天,為保著呢棵最大搖錢樹,公司甚至分埋股份畀佢,一來當係報酬,二來就係以股東身分留住佢。雖然樂華都被人話無咗王一博唔掂,但係都一方面用股份留人,一方面積極培養新星,雙線運行以脫離單天保至尊嘅情況。

　　樂華嘅玩法其實好值得東方甄選參考,未有能力馬上改善就唯有順勢而行,不如直接提升董宇輝待遇,留人同時安撫民情,好過而家日日輪流道歉都係大隻廣,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。