《小傳日記》小米造車有圖有真相!最快2月開賣就見真章!

　　《小傳日記》年尾流流車企輪流減價,偏偏小米(01810)就喺呢個時候鬧哄哄,皆因小米第一架車終於有圖有真相。

　　工信部發布《道路機動車輛生產企業及產品公告》(第377批)中入面就見到兩架小米旗下新車,兩款純電動轎車分別係SU7和SU7　Max,係由北汽負責申請生產批准,但車尾雞乸咁大寫著「XIAOMI」就肯定係小米車。

　　以功率計會分為電機功率峰值會有220KW同275KW,但係型號方面就有SU7、SU7　Pro　╱　Max,可能係功率相同但係外觀上有唔同。兩款車分別用咗唔同電池,包括比亞迪(01211)旗下弗迪電池嘅磷酸鐵鋰電池,同另一款就用咗及寧德時代三元鋰電池。成個外觀整體都好流線型,至少比起理想(02015)以大架實用為主大笨象車型輕盈得多,據講係由前BMW　iX嘅主設計師操刀。

　　喺央視節目入面,小米創辦人雷軍就提到,小米第一架車用咗3400個工程師,研發投入過百億人仔。使咗咁多錢,雷軍表示「肯定有預期」,但係汽車呢樣好「玄」,擔心無人買,又擔心太多人買開發唔切。

　　不過小米開發車都咁多年,一路由傳聞愈傳愈真,到今日終於有圖有真相,都好唔容易。花咗咁多時間,又有做手機咁耐以來嘅研發基礎,自然比起其他新公司有更大嘅機會成功。而事實都證明孖屐睇好小米造車同背後嘅生態圈,股價企穩喺15至16銀,都係對小米投下信心一票。而家有傳SU7將會下個月起量產,最快2月就開賣,即管睇吓賣成點,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。