《小傳日記》A場跌得勁,魚缸輸藥明!北水接貨唔停?

　　《小傳日記》距離阿爺出大招救市都不過一個星期多啲,A股趁過年前成交少又再隊過,晏晝開始A股又好似之前咁急瀉,深證成指最多試過狂跌4%!於是「國家級」奇蹟再現,A場中特估獲熱錢護盤,急速拉升滬深股市,最終跌幅大為收窄,上證綜指收跌近1.5%,深證成指收跌2.2%。

　　下個禮拜一(5日)人行就正式降準,今日(2日)臨降準前一個交易日A場都咁插法實在係令人費解,雖然可以理解為好消息前推低再拉升,但A場今日個跌法實在令人心寒,皆因完全係無任何消息都可以造得咁淡,難免令人聯想唔通降準都未足以維護市場信心?連跌多日,原本由阿爺吹風嘅兩萬億平準基金,就變成孖屐調轉吹。呢幾日以來都見到好多神州基金爆倉,私募魔女都要無奈減倉,所以都已經有聲音希望平準基金出台救市。

　　反觀魚缸呢邊今日表現硬淨得多,雖然叫回吐曬今朝300幾點升幅,不過下晝A場暴瀉都無跟跌,唔通今次真係見底?不過藥明就肯定未見底,繼上個禮拜五畀美國計劃禁止神州生科議案拖冧,呢幾日以來都未升過,時隔一個禮拜今日再殺,藥明生物(02269-HK)、藥明康德(02359-HK)雙雙暴跌超過兩成,而消息面上暫時係未再有新消息,無消息都沽成咁,好明顯已經係恐慌性拋售。

　　睇返資金表現,藥明生物今日同1月31號嘅大跌,最大被動淨買入券商都係上海市嘅北水,31號淨買6372萬銀,今日更加接貨2.23億銀,唔知中間有無國家隊嘅參與,不過就見到北水呢段期間都密密接,即係跌極都仲有北水墊底。

　　以前北水就被視為指標,不過如今北水都坐曬艇,仲指唔指標真係要自己諗諗,不過好嗰方面諗,就算輸都起碼有北水陪住一齊,樂觀啲啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。