《小傳日記》又再支持返,藥明被玩殘!唔畀沽空個市都係孱…

　　《小傳日記》美國時而彈出時而彈入真係夠癮,噚日先炒緊無人支持限制生科草案,點知到今日又話六個支持人頭「真狡猾,老是常出現」,居然會返兜支持返,搞到藥明又再捱沽。兩大藍籌藥明生物(02269-HK)同藥明康德(02359-HK)今日都要再跌超過7%,雖然跌,但係都慘唔過半新嘅藥明合聯(02268-HK),今日再跌一成七創新低,跌穿埋反彈前低位,實在令人慘不忍睹。

　　六個人頭彈出再彈入,藥明都跟著跌完又升又再跌,忽然縮沙唔支持無講過點解,忽然支持返無講過點解,難免令人聯想當中究竟涉及幾多操作。有人就統計過呢段時間嘅藥明系AH股都有好多「古怪」嘅交易表現,尤其係藥明康德A股嘅「轉融券」,即係沽空之用嘅貨就直頭跟足走勢。當上月26號消息流出,康德A嘅轉融券融出數量急增到23.53萬股,而之後股份就繼續跌,到31號轉融券融出數量減到得5萬股多啲,第二日就有短線反彈,但係同時間阿爺嘅限沽令都出場,暫停借貨沽空。

　　所以,阿爺將藥明嘅暴跌歸咎有人放大「洋作文」嘅影響都無可厚非,實際上孖屐唔少人都知道草案通過機會非常細,但係有料當然要發揮佢最大作用,所以一跌就跌得咁甘,當中都有唔少沽空嘅操作。

　　但同樣見到,當阿爺限沽令一出,今日藥明再跌嘅跌幅就細得多,唔通真係限沽令有用?但都係嗰句,唔畀沽空會跌少咗,但唔係唔跌,好似今日咁,六個美國議員撳個掣就可以咁影響市況,玩殘藥明,就證明AH場都弱不禁風,係咁易都隊得冧,唔好講話藥明系,而家入市都真係要好小心,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。