《小傳日記》美高梅龍年有驚喜,澳門農曆年假人頭湧湧,香港冷清

　　《小傳日記》今日濠賭股大部分表現亮麗,即使港股早段下跌,一眾濠賭股股價仍然相對硬淨,升多跌少。當中美高梅(02282-HK)更一枝獨秀,因為集團剛公布嘅去年第四季收入按年飆升逾4倍,股價抽升,經調整物業EBITDAR扭虧為盈。查實,今日濠賭股升市仲有另一個原因。澳門旅遊局局長文綺華預計,今年春節黃金周,平均每天有12萬人次旅客入境,亦即8天黃金周,至少有96萬人次旅客訪澳,主要來自內地、香港及台灣。旅客多自然帶動相關賭業股生意滔滔,財源廣進,股價借勢上升亦屬合理。

　　反觀香港呢邊,大部分時間只公布經各口岸出入境總人次,將離境嘅港人同旅客人數捆綁埋一齊。又係嘅,大數點都好看啲。不過,醜婦終需見家翁。入境處今日終於公布旅客數據。農曆年4天假期,本港累計超過392.2萬人次出入境,恢復至疫情前水平。4天訪港旅客有約74.6萬人次,當中內地旅客有約65.3萬人次。另一方面,文體及旅游局楊局長自己都話,過去數天農曆新年假期嘅來港旅客與疫情前仍有一些距離。既然總出入境人數恢復到疫情前水平嘅情況,而來港旅客與疫情前又有一段距離。即係話北上嘅港人,遠超疫情前,先可以將總出入境人數帶到疫情前。呢啲數就算唔公布,大家都推算到。

　　講起旅客,尋日睇到段新聞,話說有位順德旅客,喺澳門接受香港媒體採訪時表示,唔嚟香港嘅原因係「香港人三觀有問題,香港除咗麥理浩徑之外,無咩地方好去。」三觀指嘅係世界觀,人生觀同價值觀,唔知呢位旅客所指嘅三觀係唔係呢啲?如果係嘅話,相信呢位旅客行麥理浩徑時,應該已經確定麥理浩嘅三觀同他一致先會去行。

　　不過三觀問題事小,話香港「無地方好去」事大,楊局長千方百計,又請美斯嚟香港睇波,又翻炒廟街夜市,搞到港九新界到處都繽紛。但呢位遊客居然聞所未聞,隻字不提,實在讓人惋惜!不過又難怪呢位旅客嘅,政府做咁多嘢,都係要港人留港消費,卻忽略咗吸引旅客嚟港消費,搞到兩頭唔到岸。北上嘅繼續北上,唔嚟港嘅(旅客)繼續唔嚟。睇嚟,局長龍年要走多幾轉大灣區,宣傳下香港有幾咁繽紛,或者可以改變一下上述嗰位旅客嘅觀感。(vs)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。