《小傳日記》廣汽發布固態電池技術,惟難改車市競爭激烈形勢

　　《小傳日記》早前小米(01810-HK)推出SU7,售價只係21萬人仔多啲,遠低過預期嘅30萬,震撼車市,雷軍話車主可能有五成係女性,睇架車款又確係幾啱女士嘅。

　　不過,電動車相關消息陸續有來,廣汽(02238-HK)今日發布全固態電池技術,據講續航超過1000公里。廣汽埃安電池研發部負責人李進喺發表會上話,集團憑藉第三代海綿矽負極技術,同埋高面容量固態正極技術,實現全固態電池能量密度達400Wh╱Kg以上,較目前量產嘅液態鋰電池體積能量密度提升52%以上,質量能量密度提升50%以上,實現超過1000公里續航力,目標喺2026年完成全固態電池開發,並會先搭載喺昊鉑車型。

　　各位可能會問,固態電池同鋰電池有咩分別?兩者主要分別係電解質,鋰離子電解質係液態,以凝膠體、聚合物形式,令電池重量難以下降,而且單一鋰電池組能量唔高,所以要將多個電池組串連,增加咗重量,佔電動車整體成本好大比重。

　　另外,電解質具可燃性,喺高溫下唔穩定,大家應該都喺網上見過電動車著火嘅場面。凍得滯,電解質又容易凍結,降低電池續航力。電解質仲會腐蝕電池內部組件,充放電過程會產生晶枝(dendrites),降低電池容量、性能同壽命。

　　固態電池內部冇沉重嘅液態電解質,所以內部更加緊密、體積更細,能量密度增加。電動車採用同樣體積嘅固態電池,電容量理論上可以提升兩倍以上。而且固態鋰電池唔使電池監測、冷卻同保溫系統,亦可以喺底盤放置更多電池,令續航力大增。另外,充電速度亦比鋰電池快,亦冇腐蝕性問題、壽命更長,更加唔會因為低溫而凍結。

　　不過亦有唔完美之處,就係固態電池成本高、唔易量產,結構緊密容易熱脹冷縮。除咗廣汽之外,特斯拉、豐田亦分別計劃喺今年同2026年推出固態電池電動車。不過,現時固態電池行業嘅代表就係寧德時代同比亞迪(01211-HK)。睇嚟電動車採用固態電池係趨勢,唔係優勢,規模較細嘅車企好難單憑改用固態電池而突圍,令汽車業繼續喺無止境嘅賽道競爭!(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。