《小傳日記》球賽選舉結果不合意?百威有逾16%升幅滿唔滿意?

　　《小傳日記》上星期五(21日)恒指跌穿50天線收市,果然有料到,今日進一步下跌,仲穿過17800呢個頭一浸牛證重貨區,雖然之後逐步收復失地,最後跌唔夠1點收市,但都只係上番萬八邊,下面落到17500仲有大把牛證等劏,以現時恒指距離呢個位唔夠400點,殺落去絕對易如反掌,而且係理所當然!所謂嘅「六絕月」都唔會變得去邊,好友最好等恒指跌到17500先好落手!

　　大市仲係個跌樣,個股就永遠各自精彩。炎炎夏日令我都想飲番杯冰凍啤酒,炒得股票,呢啲時間又要吼吓啤酒股。望吓隻百威(01876-HK),雖然末期息上星期四已派送,股價就喺上星期五創咗8.68銀上市新低。

　　從日線圖睇,百威仲維持2023年1月開始嘅大跌浪,但相較當月高位26.69銀,市值蒸發咗接近67.5%,不過見佢跌浪中總有反彈。今日百威股價低見8.68銀之後持續上

升,最終收報9.05銀,升超過3%,成交超過2億銀。以今轉睇,股價已經喺日線圖收高過8.9銀,以今年1月下旬同4月中由低位反彈計,現價可以追入,今轉股價應該可以升到10.5銀以上,假設以9.05銀買入,潛在升幅都有一成六。

　　望番百威業績,通常第二同第三季表現較佳,雖然截至今年3月止三個月,股東應佔溢利減少3.4%,至2.87億美金,收入只係微跌0.4%至16.43億美金,正常化每股盈利較舊年同期微跌0.01美仙至2.26美仙。依家適逢歐洲國家杯同南美國家杯同時舉行,巴黎奧運會亦喺7月26日開幕,絕對可以帶動啤酒銷情。講笑咁講,法國國民議會6月底同7月初進行首輪同次輪選舉,英國亦喺7月4日大選,不論球賽或選舉結果係咪意料之外、歡喜定憂愁,學曹操話齋:「何以解憂,唯有杜康!」請請!(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。