《小傳日記》毛戈平招股進入倒數,IPO履敗原因多,認購要斟酌

　　《小傳日記》聽日就係毛戈平化妝品招股嘅最尾一日啦,網上好多人都喺度討論緊應唔應該抽,而家已經有好多「專家」發表咗關於毛戈平應唔應該抽嘅建議,筆者就唔喺度班門弄斧發表意見啦。不過可以一齊回顧下毛戈平之前八年衝擊A股IPO失敗嘅原因,再嚟考慮有冇抽嘅必要。

　　簡單講講毛戈平坎坷嘅上市之路。早喺2016年,毛戈平就首次遞交咗A股IPO,想喺上交所主板上市。但唔知點解,之後申請進程就陷入停滯,到咗2021年,毛戈平終於通過中證監嘅發審委會議,但之後始終冇收到中國證監會嘅正式批准。

　　2023年3月,內地實行註冊制上市制,毛戈平再次遞交IPO申請,同年9月因財務資料過期,申請被上交所中止審核,最終喺2024年正式撤回A股申請。經過幾次A股上市失敗,最後毛戈平決定轉去港交所,喺2024年4月首次遞表,後來招股書6個月失效,10月9日又再次遞交IPO申請表,終於行到今日招股呢步。

　　佢衝擊A股失敗嘅原因,大家講法不一,比較可信同有說服力嘅,主要覺得喺個人IP太重、營收較為單一、同研發能力不足呢幾方面。

　　先講個人IP太重啦,毛戈平作為國內超級出名嘅頂級化妝師,擁有多個金光閃閃嘅頭銜,例如「文化部一級形象設計師」、「2008　年北京奧運會開幕式造型設計師」等,連旗艦品牌「MAOGEPING」都用佢嘅羅馬拼音命名。公司業務經營同增長前景一直靠毛戈平個人IP驅動,佢個人魅力同口碑對品牌發展影響好大。好多消費者都因為佢超高嘅化妝技巧而買佢品牌嘅單,但咁就導致品牌同佢個人深度捆綁。萬一毛戈平IP嘅熱度下降或者出現負面報道,對品牌嘅影響好明顯,銷售同財務狀況都會跟住受影響。

　　再講營收較為單一,毛戈平旗下雖然有「MAOGEPING」同「至愛終生」兩個美妝品牌,但2021年至2024上半年,MAOGEPING品牌產品銷售收入占公司產品銷售總收入嘅比例一直維持喺95%,甚至今年上半年高達99.3%。公司太過依賴單一品牌,萬一主品牌市場表現唔好,公司業績就會受到好大影響。毛戈平獨有嘅化粧培訓及相關嘅銷售占比只有4%左右。

　　最後講研發投入不足,2021年至2023年,毛戈平嘅研發投入一直在0.8%-0.9%之間徘徊,比起化妝品行業好多2%及3%占比嘅研發投入,佢真係少好多。研發投入不足可能會影響公司未來嘅產品創新同競爭力。在開拓新市場或者進入新嘅細分領域時候,需要強大嘅研發能力作為創新,以符合市場嘅不同定位。

　　因此,毛戈平之前衝擊A股失敗嘅原因有好多,大家想抽嘅話,不妨再三考慮上述因素。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。