《小傳日記》嘉道理牽頭夾錢就係賣廣告?係實際定純粹行動?

　　《小傳日記》為咗振興本地旅遊業,港府著緊兼出力,除咗裁減咁啲力有不逮嘅人手之外,都一直希望商界「同舟共濟」。最近就有傳邁入耄耋之年嘅中電(00002-HK)主席米高嘉道理都想為振興旅遊出一分力。

　　外電報道米高嘉道理近期密斟咗好幾位城中富豪,希望牽頭集資最少近4億銀嚟提升本港形象及帶動旅遊業,預計春季展開相關計劃,但會做啲乜就未有詳細公布。據報嘉道理目前已就大計接觸過恒地(00012-HK)聯席主席李家傑、新地(00016-HK)主席郭炳聯以及係阿里(09988-HK)主席蔡崇信等等,而據報嘉道理本人已經預告會出大約3900萬銀。報道提到,蔡崇信旗下藍池資本首席CEO　Oliver　Weisberg已經證實曾經同嘉道理家族會面仲聽取咗相關計劃,但仍考慮當中;另外新地方面亦都表示正係評估建議。

　　以銀碼嚟睇,嘉道理出錢3900萬,如果係夾埋恒地、新地甚至阿里都只係出未夠4億銀,實在係有啲奀。據報道引述筆錢可能會用於買廣告來提高香港的吸引力,如果就只係賣廣告4億都差唔多,但就真係只係得廣告,起到作用有幾大可想而知,就咁嚟睇真係意思意思多於實際作用。

　　唔少報道都提及上年特首李家超同港澳辦主任夏寶龍會面後,夏寶龍曾經提到希望香港工商界將愛國愛港情懷轉化為具體實際行動。如今嘉道理牽頭「實際行動」,行動就行動咗,實唔實際就要睇吓嚿錢用成點。其實廣告嚟講政府已經好擅長,但外地遊客仍然未睇到香港嘅最大吸引力,反映推廣根本唔係旅遊業低迷嘅主要原因。主要原因就係特色模糊,所以通常同胞落到嚟,都鍾意搵啲奇奇怪怪嘅地方打咭,永遠都係政府最意想不到嘅地方,例如麥當勞道、快富街之類,先至係同胞最想體驗到嘅「本地特色」。

　　「製造特色」不如「發掘特色」,捨本逐末難以為旅遊業帶來前景。好似嘉道理旗下其實有半島酒店以及係嘉道理農場,如果嘉道理今次宣傳埋自己旗下呢啲本地特色嘢,話唔定一雞兩味呢,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。