《小傳日記》譚仔上市唔足三年半即私有化,坐艇粉絲蝕價欲哭無淚

　　《小傳日記》譚仔國際(02217-HK)上市唔足三年半,今日就提私有化,每股計劃股份註銷價係1.58蚊,比停牌前嘅90仙溢價75.56%。呢次私有化睇落好似好有交帶,但冷靜諗清楚,當初2021年上市嗰陣,招股價係3.33蚊,呢個價已經比上市價低一半以上,就算扣埋扣埋過去合共派嘅每股0.3215蚊股息,長線股東計一計都要蝕43%。

　　從街坊粉麵檔口做到變連鎖品牌,仲要上埋市,簡直係小企業傳奇。當年抽新股嗰陣,街坊抱住「入股自己日常幫襯嘅餐廳」嘅心態去抽,餐飲股知名度高,散戶抽新都會熱情啲,而且定時定候派息,覺得都幾穩陣。點知呢三年股價無起色,長線投資者坐艇至今,派息都唔夠止蝕,等到最後,公司一句「為投資者提供一次有吸引力嘅變現機會」,就將間公司私有化,「烏冬大亨」用平價回收番股份,睇嚟櫻花國商人都識得打如意算盤。

　　「丸亀製麵」母企東利多當年收購譚仔品牌,主要都係希望以中餐品牌開拓神州餐飲市場,但睇返2024年中期業績,內地嘅表現都唔係幾好,原本諗住靠「香港No.1米線」呢個牌頭闖出一片天,但實際反應就係,內地分店唔單止收入麻麻,仲要關閉咗四間表現欠佳嘅餐廳。

筆者有時到深圳探店,發現譚仔分店附近都會有來自五湖四海嘅麵店品牌同場競爭,而每間餐廳嘅人流都麻麻,難怪交唔到功課。

　　神州餐飲市場競爭激烈,地方特色美食一大堆,過橋米線有「蒙自源」,重慶小麵有「遇見小麵」,更加唔好講鼎鼎大名嘅「蘭州牛肉麵」,佢哋賣點清晰,味道有特色。反觀譚仔,喺內地餐牌你會見到乜都有:重慶酸辣湯、泰式咖喱撈米線、過橋米線、砂鍋米線……但呢條橋喺香港行得通,但對於人多口味雜嘅神州而言就唔work啦,講真,去內地食過橋米線,點解唔去食雲南菜?去食重慶酸辣湯,又點解要揀譚仔?

　　仲有一點,譚仔一路強調「香港No.1米線」,但究竟「港式米線」到底係乜特色味道?譬如蒙自源會講好過橋米線背後嘅雲南民族風情,仲搞白族服裝跳舞快閃活動,加強品牌形象,

但譚仔強調嘅「港式米線」定位唔夠清晰,其實可以參考下神州嘅港式茶餐廳,除咗經典嘅檸茶西多之外,佢地都好鍾意賣一款叫「漏奶華」嘅點心,其實喺香港冇乜地方可以食到,不過who　cares?好睇好食再撈少少老香港情懷,已經夠殺。

　　話說回頭,譚仔國際由上市到私有化,呢個過程只係一個典型嘅「小股東陪跑故事」。當年抽新股嗰班街坊,以為可以同心愛嘅米線品牌一齊成長,點知最終換嚟癡心錯付嘅結局,下次記得帶眼識股,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。