《小傳日記》蜜雪強勢膺港股凍資王,能否打破茶飲股破發宿命?

　　《小傳日記》內地知名低價茶飲品牌蜜雪冰城母企蜜雪集團(02097-HK),於今日正午截止認購,據最新資料顯示,券商累計借出1.82萬億銀孖展,毫無懸念將成為港股史上「凍資王」,超越快手(01024-HK)同埋幾年前未能成功上市嘅螞蟻集團。以公開發售部分集資額3.45億銀計,今次蜜雪集團超額認購高達5266倍。

　　如果神州AI「天降紫微星」DeepSeek招股成為凍資王,超額認購幾千倍,甚至幾萬倍,筆者都唔覺得意外。畢竟可以用低成本,低端晶片突破極限,挑戰業界王者嘅企業無乜幾多個,呢個唔單止係技術突破,簡直係一場科技革命。但一隻茶飲股,仲係一隻走低價路線嘅茶飲股,可以招股超購幾千倍都算,居然可以凍資萬八億,相信好多人都好似筆者咁難以置信。筆者並非偏見,只係覺得配得上凍資王美譽,必定有番咁上下實力。

　　究竟蜜雪集團有乜嘢秘密武器,可以打敗快手成為新一代凍資王?按照招股書上提供資料,蜜雪2023年營業額203億人仔,按年升49.6%;毛利60.0億人仔,按年升55.9%。純利31.4億人仔,按年升57.1%。以發售價202.5銀計算,市值763.6億銀,相當於市盈率約24.3倍。而根據2024年前三季度數據,蜜雪冰城營業收入187億人仔,年增21.2%;純利35億人仔,年增42.3%,營收及純利都維持雙位數高成長。雙位數增長算唔算秘密武器?但睇真啲,2024年前三季嘅升幅比起2023年嘅年度升幅明顯放緩,當中營業額升幅更腰斬,由增長49.6%放緩至21.2%。

　　睇返現時港股中兩隻茶飲股近期業績,奈雪的茶(02555-HK)2024年上半年營業額25.4億人仔,按年跌1.9%,半年轉虧蝕4.3億人仔。而茶百道(02150-HK)上半年營業額24.0億人仔,按年跌10.0%,純利2.4億人仔,按年跌60.0%。照牌面睇,蜜雪集團發展似乎更勝一籌,正如蜜雪招股書所言,集團喺下沉市場有較高嘅滲透力,而內地呢兩年消費降級,一線及新一線城市消費相對疲弱,三四線城市以至於小縣城都為蜜雪打造廣闊發展空間。

　　不過,如果單憑上市前業績似乎又難以作準。好似舊年4月上市嘅茶百道咁,如果單憑上市前一年(2023年)業績,即2023年營業額57.0億人仔,按年升34.8%,純利11.4億人幣,按年升19.4%。有咁好業績,邊個估到上市後即2024年上半年業績會倒退?更攞命嘅係,上市首日股價收跌26.9%,有傳連中證監都驚動埋。

　　如果話茶百道生不逢時,上市時撞啱港股低潮,招股反應慘淡,所以首發潛水情有可原。咁奈雪的茶2021年6月上市潛水逾一成都令人難以理解。事關奈雪招股時,當時港股相對熾熱,恒指當時企緊28000點。奈雪的茶當時共收到64萬份認購申請,超額認購432倍,凍資約2200億元,風頭一時無兩,該股最終以招股價上限19.8銀定價。但上市首日,股價收跌近14%,一度被市場戲稱「尷尬的茶」。

　　今日奈雪的茶同茶百度分別收升33%及9%,炒起影子股概念。不過,無論升幾多,股價有排都返唔到家鄉:奈雪的茶今日收報1.77銀,較2021年上市價19.8銀蒸發91%,而茶百道今日收報10.34銀,股價潛水41%。咁啱港股難得強勢,蜜雪集團萬千寵愛在一身,3月3日掛牌,真係希望佢要爭氣,為茶飲股省靚招牌,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。