《小傳日記》侵侵大徵稅政策急轉軚,係臨時補鑊定早有預謀?

　　《小傳日記》關稅事件一日一版本,花旗國總統侵侵直頭可以喺美股盤中宣布暫緩對多國加徵稅,強行造高美股,原來唔止港股可以單日暴跌3000點,連道指都可以單日暴升3000點,可以預期未來各種「破紀錄」嘅情況只會愈來愈多。

　　個個都買佢怕,各國連夜趕路去花旗國傾關稅,兼且聽聽話話唔玩報復,於是特朗普都識做,有份派人嚟傾嘅75個國家都只係將會被加徵10%關稅,而且仲可以暫緩徵稅90日。相反神州方面就一直企硬,對等報復層層加碼,結果花旗國最新徵稅稅率去到125%,再平嘅商品都無可能有競爭力,經濟脫勾風險已經近在腳邊。

　　不過有趣係侵侵隔晚口頭功夫上畀足面,不斷讚國家主席習近平係聰明人,仲「好鍾意同尊敬習近平」,係主席嘅好朋友,更讚佢熱愛自己國家同時清楚應該要做啲乜,成個態度都「非常誠懇」。

　　其實近期都不斷有市場揣測,侵侵嘅MAGA計劃並唔單止於係「挾關稅以令諸國」,而係透過關稅逼近使國家去做某啲動作,其中有可能嘅就係增持美債。意見認為特朗普希望以關稅逼使國家增持美債,鞏固花旗國實力同財政。花旗國自從實施QE大法以來,債務堆到天咁高,政府借貸成本可以話就係花旗國嘅弱點!所以星期三(9日)美債價格全面攀升,30年期債息一度衝破5厘關口,分析認為沽壓好可能係來自神州。有報道話,美債出現波動之後,侵侵就對放生各國,並向神州釋放一啲善意。

　　除咗幫襯美債之外,能源都係侵侵想sell嘅產品之一。早兩日佢就講過,如果要消除花旗國同歐盟之間嘅貿易赤字,關鍵就在於歐盟要出錢買能源,佢更話歐洲一直都「未幫襯夠」,認為歐盟必須承諾要買夠3500億美金,先可以換到全面關稅豁免。所以特朗普好明顯就唔係想單靠關稅嚟「賺快錢」,而係想用貴稅嚟達成更長遠嘅貿易關係,咁至sustainable嘛。

　　政治家總有一百種原因掩飾自己嘅過錯,甚至會選擇「喪事喜辦」,收拾爛攤子都可以美化成「每日解決一個問題」。從全球貿易戰收縮到對華貿易戰,侵侵大可以話自己係早有預謀,不過人在江湖講嘅係個信字,當孖屐對你講嘅狂言唔再有信心,咁就真係恨錯難返,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。