《小傳日記》吸人才又托樓市，一雞兩味有得試？

　　《小傳日記》二十大前魚缸繼續跌唔停！雖然憧憬緊二十大會有好消息，但係連跌咁多日又再創１１年新低都難免令人灰心，加埋聽日花旗國又準備出９月份ＣＰＩ，話唔定嚟個終極一跌都有可能。

　　今日魚缸當然繼續係悶局，無乜嘢板塊炒得起，而最高興都係地產佬，因為又有傳政府正係打算放寬印花稅同簽證嘅限制，以彌補人才流失。據《彭博》報道，政府計劃畀１３個行業優先僱用非本地勞工，包括資產管理、金融科技和環境、社會和治理金融服務。同時針對呢班人，政府都有可能放寬對非居民買樓人士所需要支付嘅１５巴仙印花稅規定，呢啲勞工喺香港停留一定年期後就可能會獲得退還部分或者全部稅款。

　　所以今日晏晝出咗消息之後，成班本地地產佬都逆市倒升，恒地（０００１２）升多過１巴仙，收報２１﹒７５元；新地（０００１６）升多過兩巴仙，收報９０﹒６元；新世界（０００１７）升多過兩巴仙，收報２０﹒６元；長實（０１１１３）升多過１巴仙，收報４６﹒２５元。雖然據講政府仲未想撤辣，不過都有些少甜頭畀地產佬袋住先。不過甜頭都係甜頭，聽落幾好但其食得唔多，呢條橋最主要都係吸引人才為主，買樓都只係其次。

　　如果預計係要吸引神州嘅人才，都有好多誘因畀佢哋來港買樓，而家香江樓價偏低水，如果公司先行買入畀外來人才住，變相先持有，之後樓價反彈都可以待價而沽，又或者繼續收租都可以，簡單嚟講都算係趁低吸納。但係對於地產佬嚟講都唔算係長遠計劃，當然最重要都係平衡賣樓同市民所需，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。