《小傳日記》疫情肆虐有連花清瘟就無相干!食得多原來都好傷肝?

　　《小傳日記》自從神州開始放寬防疫,感染數字會唔會直線飆升?由阿爺為群眾防疫,變成而家由人民自行防疫,反而人人意識都提高唔少,連日來瘋狂掃藥,中式就掃連花清瘟,西式就掃布洛芬,總知就要有藥看門口。所以近期全部相關個股都水漲船高,由A場賣連花清瘟嘅以嶺(深:002603),魚缸賣布洛芬嘅新華(00719),甚至網上賣藥嘅巴巴個仔仔(00241)、京東健康(06618)同平安好醫生(01833)都炒到熱辣辣。

　　因為近期同胞瘋搶連花清瘟,喺上面就流傳咗各式各樣嘅「連花清瘟」產品,連花清瘟茶、蓮花清溫膏,甚至仲有連花清瘟紅酒、連花清瘟麵同連花清瘟煙,當然最後都係P圖惡搞!不過最近同胞防疫又有新招,居然係罐頭糖水桃!有傳中招食咗可以紓緩症狀,原來上面有唔少人細個感冒屋企人都會畀啲「甜桃」佢哋食嚟氹佢哋開心咁話。有醫生就話,病到死吓死吓嗰陣食嚿「甜桃」,其實只算係一種安慰劑,唔可以殺死病毒。不過安慰劑喺醫學上都有一定用途,話唔定食桃都真係得!

　　連花清瘟搶極都唔夠,近期上面就有傳,有醫生已經連續接咗第三個因為食連花清瘟,食到傷肝嘅患者,有醫生又話連花清瘟醫唔到甚至預防唔到感染,但係種種原因所以唔可以公開咁講

。雖然講到似層層,不過連花清瘟全民瘋搶之後,好多藥都炒到貴曬,阿爺都開始出手叫醫藥國企幫手保供藥,亦都開始打擊囤積藥物,可以見到一招又一招咁出,所以唔排除都係近期先出嘅「連花傷肝論」都可能係遏止連花清瘟炒風嘅一環,加上傳到係醫生私底下講,又增加可信性,而近呢幾日以嶺A股股價都回落返,唔排除係阿爺嘅招數有效啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。