《小傳日記》小米都係AI概念要入手?谷歌AI答錯問題好醜!

　　《小傳日記》魚缸今日晏晝忽然大逆轉,有熱錢追捧科技股,段估都係繼續追炒AI概念,所以今日QQ(00700)、巴巴(09988)下晝都勁彈最多4巴仙,恒指今朝跌一跌完下晝最多升超過300點,最終都keep到完場。不過強勢反彈之下成交都唔升好高,都係唔夠1200億,彈力唔算好強!

　　今朝百度(09888)最多試過跌多過8巴仙,主要就係官媒大潑冷水,話目前AIGC只係基於現有信息形成綜合,只有喺單純嘅測試環境下,先可以畀AI獨立上線。官媒又提到,

而家所謂「AI概念股」含水量太高,好多仲係初期研發階段,而或者係某間子公司參與咗少量programming就當係「概念股」,叫投資者唔好「跟車太貼」盲炒。

　　又難怪官媒要降一降溫,今日就連隻小米(01810)都炒起,原因係有人醒起,小米旗下有隻「小愛同學」都係屬於AI,雖然比起而家嘅AI聊天機械人好似蠢好多,不過都無阻股民憧憬小米AI有得搞,有網民仲話小米13銀都仲係好抵要衝咁話!

　　不過被人話係ChatGPT最大對手嘅Google就出咗事,噚日喺美國就試推趕製嘅AI聊天機械人Bard,點知喺問答大會上面就答錯問題,有人問到關於一支天文望遠鏡

JWST望遠鏡,Bard就答咗佢係第一個影到太陽系外行星嘅望遠鏡,但係NASA官方解答歐洲南方天文台嘅VLT望遠鏡先係,答錯問顯令到原本已經狀況緊急嘅Google更加尷尬,仲連股價都要跌超過7巴仙!

　　不過睇到AI概念至少呢一輪都會係熱炒主題,有券商就建議除咗本身自帶AI業務嘅股份,銷售內容或者SaaS概念都可能會受惠聊天機械人熱潮,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。