《小傳日記》HKTVmall開直播頻道,直播帶貨殺出血路?

　　《小傳日記》自從新東方在綫(01797)向直播帶貨發展後,結果殺出一條血路,股價由2.84銀歷史低位鹹魚翻生,升到今年1月高位75.55銀,公司市值都番幾番。今年1月中,新東方在綫公布,截至去年11月30日止中期未經審核純利約5.85億元人民幣,每股盈利58分,2021年度虧損逾5億元人民幣。「直播帶貨」呢四隻字變到好值錢咁,近期有唔少公司都開設直播帶貨,股價急升得好快。

　　香港科技探索(01137)宣布,旗下24小時網上購物商場HKTVmall加強發展直播購物頻道「HKTVLive」嘅直播系統功能,會喺今年4月中旬試播。第一階段支援70條直播頻道,預計喺5月正式推出,並逐步擴展到100條頻道,全力支援線上同實體零售商戶喺HKTVmall手機應用程式製作直播節目。

　　集團話,無論大中小型企業,都可享3%嘅極低佣金。透過製作直播節目,隨意將實體店營業時間拓展到每星期7日,每日24小時,以即時同觀眾之間互動,直接接觸超過150萬潛在客戶。

　　香港科技探索股價今日急升超過27巴仙,成支大陽燭隊爆舊年12月開始嘅橫行區。雖然9日RSI就嚟嚴重超買,但睇下之前嘅新東方在綫,再睇近幾日嘅TVB(00511)嘅股價走勢,呢啲時候技術指標似乎無乜參考性。總之有直播帶貨概念,有嘢憧憬下,就可以炒得好誇張,某程度上反映「孖屐」係幾咁唔理性呀!當然,所謂物極必反,炒過火都會炒燶,想搭「順風車」嘅朋友切忌瞓身去追呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。