《小傳日記》下星期就係上海車展,銷售數字好關鍵!

　　《小傳日記》上海車展下個星期二(18日)就開幕,唔少牌子就會喺車展期間發表新車,所以早排先會出現爭相減價清貨嘅情況,嚇到孖屐以為間間都去唔曬貨要劈價促銷,其實就係留返啲庫存位畀新車,間間都嚴陣以待復常後嘅第一次車展。

　　其中大家最關注嘅BYD(01211)將會議喺車展出最新款SUV,將會「王朝」系列產品,車展前已經出定預告,不過「神龍見尾不見首」,BYD只係公布咗車尾圖片,但係就被人話似波子架Cayenne　Coupe,不過據講向後延伸嘅兩片式擾流尾翼、垂直式第三煞車燈及車尾鏡頭就有啲唔同,詳情係點就是要下個禮拜先揭盅。

　　而吉利(00175)以及旗下極氪同Volvo都重點推出新車,包括吉利銀河系列L7、極氪ZEEKR　X以及Volvo　EX90,3架新車都電動車,可以見到吉利已經全面力谷電動車,同BYD嚟個7面大對決。

　　各大品牌蓄勢待發,相信定價方面都會焦點。之前減價戰令孖屐擔心新能源車嘅議價能力降低,而今次車展新車點定價都會係決定最少上半年業績走向嘅關鍵。目前神州消費市場都正係復甦當中,餐飲零售類公司都已經飲咗復甦頭啖湯,而第二波嘅復甦力量都仲未見得到。而車始終都係高消費產品,各大品牌樣喺目前嘅情況爭取最大嘅利潤都係關鍵,而今次車展嘅銷售情況,亦都係觀察消費市場復甦進度嘅一個指標,尤其如果細品牌都揾到啖飯食,咁樣車股就有望扭轉近期嘅頹勢,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。