《小傳日記》工會發聲!有人發起挑釁再錄影令空姐喊驚?

　　《小傳日記》魚缸陰陰吓終於連18800都無埋,仲創埋全年新低18620,睇嚟魚缸都真係要轉勢,下一個支持位都要睇住18000先!

　　魚缸冷清清,不過近日「因航」就鬧哄哄!自從「毛毯事件」之後,據聞而家航班上對於「毛毯」都特別敏感,會逐一問乘客要唔要毛毯,又會用齊三語廣播,總知就費事有人再因為得唔到張毯而出事。

　　雖然CEO林紹波就話事件已經告一段落,不過網上風波就好明顯未告一段落。除咗有疑似空服上網發文發洩之外,又有空服喺IG出story影咗自己個name　tag去「十卜」

被炒嘅同事,表明自己嘅服務語言只有廣東話同英文,但就有神州網民見到,疑似即時用佢個名嚟起底,仲搵到佢去開間瑜珈中心。

　　事隔幾日,空中服務員工會終於發聲明,對3名涉事空中服務員被解僱表示深切遺憾,而根據公司指引,英文先係服務期間嘅主要語言。工會提到,疫情過後人手同資源不足,工作量大幅增加而且又薪酬過低,前線員工士氣無比低落,先會出現今次事件。工會聲明又講到,有網上出現呼籲乘客挑釁空中服務員再攝錄嘅行為,令到員工承受巨大心理壓力,要求公司方面給予明確指引以保障前線員工。

　　錢可以解決到嘅問題就唔係問題,面對復甦當中嘅民航市場,硬件準備得當之餘,軟件都要準備妥當,如果員工士氣低落,自然就會引發呢啲無妄之災,記得工會今年初先至醞釀過罷工嚟,如今問題似乎都仲未解決,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。